Recientemente Departamento di Agricultura, Cria y Pesca (DLVV) a haya confirmacion di presencia di Inkberry, Scaevola plumieri, na e costa Noord di Aruba. Esaki DLVV a haya di Dr. André van Proosdij, autor di Arnoldo’s Zakflora, Wat in het wild groeit en bloeit op Aruba, Bonaire en Curaçao. Tal buki, e di 4 edicion, completamente revisa, 2012 ta bisa cu e Inkberry ta origina di Caribe y Florida, incluso ta haye na Curaçao cu Boneiro. Sinembargo e edicion di 2001 no ta haci su mencion.
E motibo pa a verifica presencia di e Inkberry tabata cu recientemente Dr. van Proosdij a notifica DLVV di presencia di Beach Naupaka, Scaevola taccada, den naturalesa na Savaneta. Loke tambe a resulta asina. Ariba esaki DLVV a bai e costa Noord di Aruba pa confirma si ta e mesun especie DLVV, desde un par di aña, tabata nota na cierto localidadnan eynan y ariba rifnan. Sinembargo confirmacion den veld tabata basta dificil pa haya debi cu e Beach Naupaka ta hopi similar cu e Inkberry. Di 2012 DLVV tabata na altura di nan presencia na Curaçao cu Boneiro pa e mesun mencion den e buki ariba. Tabata den color di beishi un hende por a distingui e dos sortonan for di otro pero e mester yega net na e momento cu e mata ta pari si.
E motibo pa DLVV a tuma nota di e mata tabata cu un institucion Caribense por medio di su newsletter a yega di notifica recipientenan di e habilidad di e Beach Naupaka pa invadi naturalesa. Tambe DLVV tabata na altura di su presencia na Aruba pa embeyecimento di jardinnan pasobra ta DLVV mes a aproba su entrada. Recien mes atrobe. Sinembargo ariba e posibilidad di colonisacion di Aruba di e Inkberry por medio di e via natural, nan simiyanan por drief ariba lama, DLVV no tabata conta.
Presencia di ambos especie den e flora di Aruba lo aumenta e biodiversidad di e naturalesa. Un biodiversidad grandi ta ofrece mihor posibilidadnan na especienan pa confronta peliger di extincion cu un especie invasor por trece. Manifestacion di e Beach Naupaca por contribui na e ultimo aki. DLVV a informa instancianan, cu por percura pa proteccion di e area unda e Inkberry ta crece, por medio di regula e intensidad di recreo cu e area por carga.
DLVV ta kere, debi na su recien colonisacion di Aruba, cu su populacion ta chikito y vulnerabel pa extincion. Tambe DLVV a conseha pa pone e Inkberry ariba e lista di e landsbesluit pa proteccion di especienan di flora y fauna cu ta den peliger di extincion. Pa mas informacion email DLVV na [email protected], of jama 5858102.