Instituto Medico San Nicolas (IMSan) e ultimo añanan ta observa Dia Mundial di Diabetes cu diferente accion di conscientisacion, cubriendo diferente area di atencion cu un enfoke riba prevencion. Mas ainda pasobra na IMSan tin e Centro Diabetico cu ta atende tur persona cu tin diabetes of ta prediabetes. E aña aki tambe e partnernan di Plataforma di Salud a uni y entre otro IBISA a organisa un caminata y a percura pa riba Bus di Salud agrega chekeo di presion di wowo te cu dia 30 di November. IMSan a organisa un dia di e.o. screening pa diabetes, informacion y charla tocante diabetes y wowo, demostracion di cuminda saludabel, cu a conta cu participacion di mas di 150 persona.
Cresci-Ann Croes, un studiante haciendo su “afstudeerstage” den e ramo di estudio Voeding en Dietetiek na IMSan, tabata encarga hunto cu e otro coleganan di IMSan pa organisa e dia cu actividadnan basa riba e tema scogi pa World Health Organization pa 2016, esta “Eyes on Diabetes”.
IMSan a combina e esfuersonan y e personal di dos di nan departamentonan mas grandi, esta Centro Diabetico y e clinica di bista, pa presenta un bon programa, cu chekeonan medico gratis durante oranan di mainta y di atardi. Ademas, den oranan di atardi pa anochi a ofrece diferente presentacion di parti di e specialistanan di wowo y midimento di presion di wowo. Personanan cu a bishita IMSan e dia aki a ricibi informacion tambe encuanto di bon nutricion, movecion y productonan cu diabeticonan por of ta uza.
Tambe a laga esunnan presente cera conoci cu diferente opcion di cuminda/snacks cu ta low-carb, o sea nan tin un nivel abou di carbohidrato. Carbohidrato tin un influencia considerabel riba e nivel di glucose (sucu) den e persona su curpa y pues ta consehabel semper pa e diabetico y esunnan cu tin un riesgo halto pa haya diabetes, y en realidad pa tur persona en general, pone atencion extra riba nan consumo di carbohidrato. Aki mester tin un balansa entre e cantidad cu ta come na carbohidrato y e energia cu ta uza diariamento.
E evento aki tabata habri pa publico en general y IMSan ta satisfecho cu e interes di parti di comunidad pa siña mas tocante di e enfermedad cronico aki cu ta afecta hopi famia na Aruba. Tambe e relacion cu tin entre diabetes y bista cerca un persona cu tin e condicion aki.
Prevencion y auto cuido ta keda e enfoke y ta esencial pa preveni diabetes pa medio di bon estilo di bida, esta e.o. nutricion saludabel y suficiente movecion, pero tambe chekeo regular cerca bo dokter di cas pa e factornan di riesgo. Y ora e persona ya ta diabetico caba ta importante pa e pone e atencion rekeri riba su condicion y preveni cu e ta haya complicacion relaciona na diabetes.