ImSan cu celebracion di e 100 pashent cu a caba tratamento di radioterapia

ImSan a celebra awe cu e di 100 pashent cu a caba tratamento di radioterapia. Minister di turismo, salubridad publico y deporte, sr. Dangui Oduber a comparti palabra cu e logro aki tabata un proyecto cu gobierno a kere aden.

E mandatario a splica cu a pone fondonan disponibel pa awe por mira e logro cu pashent por ricibi nan tratamento na Aruba mes. “Cu e servicio aki pashent no mester keda manda afo pero keda trata na Aruba mes den compania di famia y conocirnan”, e ta bisa.

Ta conoci cu pashent cu mester tratamento di cancer mester a manda Colombia of Hulanda pa por ricibi un tratamento, esaki a cambia y ta un logro pa Aruba. E proyecto aki tambe ta beneficia pa e fondonan di AZV cu no lo mester haci gastonan enorme pa manda un pashent afo pa ricibi tratamento.

Minister Oduber tambe a anuncia cu awe a pone 1 miyon florin disponibel pa percura pa e 12 cambernan den ImSan bay den uso pa pashent tin e posibilidad pa keda ‘overnight’ den hospital su comodidad.

“Nos lo haya 22 camber extra y dentro di poco ImSan lo haya su JCI Accreditation”, e ta splica. E JCI accreditation lo significa cu nan lo por cuminsa cu turismo medico y tambe e ta pa dokter nan local por keda reconoci.

E mandatario a bisa cu mirando e logronan y expansion esey tambe ta duna un oportunidad pa studiantenan den exterior cu ora di caba nan estudio por eherce nan carera na ImSan.

Mirando e desaroyo di ImSan conhuntamente cu otro proyecto manera di hotel, e mandatario ta bisa cu proyectonan cu tin pa sigui engrandece San Nicolas ta keda un punto importante. “Transformando cuido medico na Aruba pa un miho cuido, calidad y servicio. Nos ta kere den e desaroyo di San Nicolas.”

Comments

comments