Despues di dos siman cu nos a haya e efecto di e oil spill AHATA ta keda cu un poco preocupacion pa cu esaki paso na final e costa ta importante pa nos bishtantantenan segun Sr. Jim Hepple ta splica.
Afortunadamente, no tin droplets a bin na e costa sur, unda e hotelnan ta situa y un di nos miho beachnan, Palm Beach no a sufri ningun efecto di e oilspill. Pero e costa noord si a sufri bastante daño. P.e. Natural Pool ya caba tin dos siman cera, y tour operatornan no ta permiti pa bay eynan, te ora cu e wordo habri bek. Esaki ta un lastima pa motibo cu Natural Pool ta un luga bastante popular bou nos bishitantenan, y sigur esaki tin su efecto ariba turismo. AHATA sigur tin comprension pa cu e situacion. Unico cos cu por bisa cu esaki ta cosnan cu por pasa, pero Departamento di Calamidad mester ta prepara pa casonan asina.
AHATA tambe a yuda recluta voluntarionan pa yuda haci limpi na e costanan, y tambe otro organisacionnan tambe a yuda recluta voluntarionan. Pero si Sr. Jim Hepple a enfatiza cu Aruba mester cuminsa prepara y traha ariba un plan di emergencia, ya cu esaki por tabata tin consecuencianan mucho mas grandi.
Sr. Jim Hepple a califica esaki como un wake- up call pa Aruba. E caso aki a trece frustracion cerca e instancianan concerni, y Sr. Hepple ta spera cu pa un proximo biaha Aruba lo ta mas miho prepara.
Aruba tin un ekipo di crisis y un oil spill semper bo mester ta cauteloso cun’e. Tin plan y programanan cla pa monitor e beachnan, den caso cu e ta necesario pero mester tin un coordinacion y planificacion ariba un base nacional. Y no solamente pa e hotelnan, ya cu esaki ta algo cu por afecta nos tur.
Awendia medianan local ya no ta existi, ya cu tur cos ta aparece ariba internet y varios hotel tabata hopi preocupa cu posibel bishitantenan lo haya sa di e problema atrabes via di medionan local y cuminsa post ariba Facebook y Tripadvisor, y cu Aruba tin petroleo ariba su beachnan. Esaki lo causa un daño irreparabel na nos turismo. Hotelnan mester a dedica un gran cantidad di tempo pa purba minimalisa esaki. Cu noticianan asina mester ta hopi cauteloso con ta comunica na nivel local ya cu e ta bira internacional na un forma rapido.
Sr. Jim Hepple ta di opinion, no por bisa cu esaki lo no sosode mas pero loke mester haci ta prepara e plannan necesario pa den un caso asina den futuro. Pero na final, e ta un responsabilidad nacional y esey mester wordo coordina na un manera eficiente y e team di calamidad mester ta mas miho prepara pa cosnan asina.
Aña pasa Aruba a pasa den un tormenta, caminda cu pa varios dia luganan a keda inunda. Mester tene na cuenta cu door di cambionan climatico, por spera mas di casonan asina y Aruba mester ta miho prepara den tur sentido, segun Sr. Jim Hepple, director di AHATA.