Tripoli, LIBIA- Imigrantenan West- Africano ta wordo cumpra y bendi den pleno luz di dia den un mercado di esclabo moderno na Libia. Esakinan ta storianan cu sobrevivientenan ta conta na e agencia di Nacionnan Uni cu ta yuda nan bay bek cas.
Personan victima di traficacion humano na Libia ya caba a yega di raporta violencia, extorsion y trabao di esclabo. Pero e testimonionann mas reciente for di e Organisacion pa Migracion ta sugeri cu e compra y benta di sernan humano a bira asina normal, cu nan ta wordo bendi den publico.
E pais Noord- Africano ta un punto di exodo grandi pa refugiadonan di Africa purbando di haya un boto pa hibanan Europa. Pero desde cu a derumba Muammar Gaddafi, e pais escasamente pobla a cay den un caos violento y migrantenan cu poco placa y mayoria biaha sin papel, ta esunnan mas vulnerabel.
Un sobreviviente di Senegal a bisa cu el a wordo hiba pa un luga yen di stof den zuid di Libia, despues di a cruza e desiertdo for di Niger den un bus uza pa traficadonan humano. E grupo a paga pa wordo hiba na e costa, unda nan tabata planea pa subi un boto y haci e cruze peligroso pa Europa. Pero diripiente e chauffeur a bisa cu e intermediario no a dun’e su parti di e cen y a pone e pasaheronan na benta. E storia aki a wordo confirma door di varios migrante cu a logra scapa for di man di e malhechornan aki.
Despues di e benta, e migrante ta wordo hiba pa un prizon improvisa. Akinan e prizoneronan ta wordo forsa pa traha sin pago, of riba racionnan escaso. E captornan hopi biaha ta yama e famia, demandando un rescate di 300 mil franco West- Africano (mas o menos $470), pa despues wordo bendi pa un otro prizon unda e demanda ta subi sin ningun splicacion. Hopi biaha esunnan cu ta keda demasiado largo sin haya rescate ta wordo mata y otronan ta muri di hamber y malesa, pero cifranan exacto no ta existi. Si e cantidad di imigrante baha, e captornan ta bay riba mercado y ta cumpra otro. Incluso, un creciente consciencia internacional di e problemanan cu e imigrantenan ta pasa aden, ta wordo explota. Criminalnan ta laga pasa como gruponan di ayudo cu ta yuda imigrantenan, pa asina gara nan, abusando di nan gana di regresa cas, despues di a cumpra nan libertad.
Aunke mayoria imigrante sa cu e biahenan riba boto pa Europa ta uno hopi peligroso, poco ta realisa cu nan ta enfrenta peligronan mucho mas peligroso na Libia, prome cu nan yega e costa mes.
“Tragicamente, e mensaheronan mas creibel ta e migrante bayendo cas bek cu e ayudo di organisacionnan internacional. Demasiado biaha nan ta kibra, nan a wordo brutalisa y abusa. Nan bosnan tin mas peso cu di cualkier otro hende”, segun e vocero di IOM, Leonard Doyle.