IMF ta trahando riba un rapport, segun minister di finansas, Angel Bermudez. E ta sigui conta cu esaki ta un procedura normal di IMF. Despues nan tin cu entrega e rapport na nan board. E board mester tuma nota di dje y mester aprob’e. E ora ta haya un rapport mas inclusivo y mas extenso. Pero esaki ta djis un statement. E ta un expresion di kico ta nan prome conclusionnan y kico lo ta nan recomendacionnan cu nan lo bin den extenso cu ne den nan rapport, cual ta spera cu lo sali banda di Juli.
E mandatario ta sigui splica cu riba su mes e statement aki no ta inclui nada sorprendiente, en todo caso no p’e, pa loke ta trata e caminda cu nan ta para awor aki. Keto bay nan ta riba e ruta pa sali for di entre otro e debe grandi cu Aruba tin y asina tambe reduci e gastonan di interes. IMF ta confirma cu esey ta un ruta cu mester sigui cana riba dje y asina ey yega na un reduccion di e debe nacional y door di esey tambe na un rebaho di e gastonan di interes, pa asina ey gobernacion por haya mas espacio financiero pa por bin cu cierto manehonan nobo den futuro.
Basicamente pa e minister, e statement ta duna un indicacion cu e ruta ta bon, pero e ruta ta largo ainda. Ainda no a yega e meta, cual e minister ta enfatiza. Nan ta adverti tambe cu na caminda lo por topa cierto roadblocks y cu nan ta bisa cu mester ta prepara pa esey. Pesey tambe nan ta recomenda caba den e statement aki cu lo ta bon pa prepara cierto scenario, si acaso cu topa cu e roadblocknan eynan. E ora tin nan mesora na man pa introduci nan y pa implementa nan y no ta perde tempo cu e risico cu ta haya un caida e ora ey den nos economia y consecuentemente atrobe lo mester aumenta e debe.
Mester sigui riba e ruta aki, den e siguiente gobernacionnan. Esey en todo caso ta un hecho y segun e minister, riba esey no lo ta un sorpresa. Esey kiermen tambe cu den e ruta ey cu tin cu keda mantene un surplus riba e presupuesto. E ta bay duna poco espacio pa bin cu cosnan pret den futuro, pero esey tambe ta depende di e crecemento economico cu Minister Arends mester percura pe den futuro, pa asina ey haya un entrada adicional, a base di cual e ora ey por renoba tambe cierto parti di e economia.