Imelda Kleuterschool ta den un situacion critico

Hopi mayor a cuminsa yama nos pa bay busca informacion di parti di SKOA pa haya sa kico ta pasando cu edificio di Imelda Kleuterschool. A papia cu Josette Daal, directora di SKOA, pa haya sa kico ta pasando. El a splica cu nan ta wardando accion tuma lugar di parti e departamento cu ta cay bou di minister di enseñansa.
Segun Daal, pa haya un idea con e edificio ta, e ta pidi pa un mantencion grandi. Tabata tin combersacionnan for di aña escolar 2013/2014 riba e situacion di e scol, unda cu a laga haci limpi den e klasnan, pasobra a constata cu tabata tin hopi stof. E parti di stof den klas, no tey mas. Pa e parti aki ta e parti di oficina di e cabesante di scol. A laga haci diferente test desde 2013/2014, a constata cu den e oficina tin stofnan cu ta hopi fastioso y dañino. A bolbe laga haci test pasobra nada no a wordo haci di e oficina aki. Awor aki e compania cu a haci test, pa no drenta, pasobra esun cu ta alergico p’e, ta sinti’e di biaha. E luga mester wordo drecha.
E parti fastioso ta cu e cabesante di scol a pasa henter un aña escolar sin un oficina, ta keda bay bin, pasobra e no tin caminda di sinta, pa e asumi su responsabilidad pa loke ta e scol. Durante vakantie, na comienso a papia cu instancianan concerni cu ta Directie Onderwijs entre otro. A haci palabracionnan mirando cu ta un trabao grandi. E muraya ta uno bieu y friu y tin caminda cu e vesterbanknan ta brokkel af. A haci palabracionnan cu eseynan ta trabao cu mester a wordo haci den vakantie. Lastimamente e no a sosode. E maestranan a coy curashi toch, drecha klas lo mas miho cu ta posibel pa ricibi e muchanan, pero si wak e edificio mes, e tegelsnan ta lanta, bañonan no ta netjes pa ricibi muchanan di scol y awo tin e preocupacion atrobe. E cabesante ta habri scol y no tin un oficina. Ni sikiera un trailer.
Awor aki e cabesante ta cana rond y no tin caminda di sinta pa haci su trabaonan, segun Josette Daal.

Comments

comments