Personanan cu a yega mainta trempan na Misa Immaculada Concepcion na Santa Cruz a haya un shock. Un imagen di Virgen Maria di mas cu 150 aña destrui.
Mesora a bati alarma pero mucho cos no por haci, ya cu e acto di destruccion a tuma luga y di ningun forma por wordo remedia.
E figura di Virgen Maria ta uno traha di un material suave y ta data dim as cu 150 aña. Pastor Jairo Maduro ta calcula rond di 160 aña, pasobra e misa mes tin 150 aña. E ta un imagen traha pa paden. Sinembargo na aña 2003 momento cu a celebra 150 aña di misa y 40 aña di e parokia, a dicidi di pone pafo den e cura. Pues 18 aña pasa. Niun dia un hende a tribi di mishi cu e Virgen Maria te cu awe marduga.
Ken a hacie of con el a tuma luga no tin ningun idea. E camarana di Maria School, cu ta cerca, a stop di traha pa 3’or di marduga.
Tambe a constata cu riba algun graf tabatin sushi humano. No ta conoci cu na mesun momento esey a sosode.
Pastor Jairo Maduro a expresa su tristesa pa e sucedido y a bisa “destruccion a yega na port’i misa”. E conseho parochial awor ta bay sinta na mesa y dicidi kico lo bay haci. Probablemente mester bini cu un imagen di un material poco mas robusto pa e parti pafo. E material aki tabata uno mas suave y tabata en realidad pa paden. “No a pensa cu tat a bay destrui esaki. E tin un imagen cu tin su historia. E hecho cu un hende ta bay kibra un imagen mester ta motibo di preocupacion di kico ta pasa den cabes di e hendenan,” Pastor Jairo a expresa.
E sitio unda e imagen tabata poni tin un banki, y hopi fiel tabata sinta y reza dilanti e imagen di Virgen Maria. Awe tin un tristesa grandi den parokia di Santa Cruz.