Covid-19 tin henter mundo den su gara pa varios luna caba. Esaki sigur a duna hende oportunidad pa pensa riba kico ta realmente importante den bida. Presion pa alcansa quota di produccion of di benta no ta conta mas. Nos ta mira bisiña yuda bisiña pa evita cu nos grandinan mester sali haci diligencia y asina expone nan mes. Nos ta mira tambe cu ta dedica tempo di calidad cu otro den e seno di famia.
E manera con nos autoridadnan ta atende cu e crisis merece nos reconocimento. E ekipo cu ta maneha e crisis bou guia di nos Prome Minister, Evelyn Wever-Croes, merece nos aprecio, nos gradicimento pero mas cu tur nos sosten den oracion. E cuerpo medico cu ta atende cu esnan afecta pa e virus, cu peliger pa nan propio bida, tambe merece nos aprecio. No lubida nos Cuerpo Policial cu ta haci un bon trabou pa mantene orden publico. Pues Iglesianan Cristian di Aruba kier expresa un palabra di aprecio y di gradicimento na tur e personanan aki.
E webo di oro cu yama turismo no ta duna Aruba e entrada cu nos a custumbra cune. Tur sector y cada famia mester ta prepara pa sacrifica den e lunanan nos dilanti. Esey ta conta pa gobierno, pa sector priva, pa cada famia individual y pa cada iglesia. Planta bo propio berdura y fruta cu ta bay bon cu nos clima por duna un tiki alivio pa cada famia. Den pasado Aruba a enfrenta un crisis cu ceramento di Refineria Lago. Danki Dios cu nos hendenan local a gana experiencia e tempo ey cu awor por ta beneficioso den enfrenta e crisis actual.
Pastornan rond mundo y aki na Aruba tambe mester a busca formanan creativo pa mantene nan mes den contacto cu nan congregacion ultimo lunanan. Hunto a haci oracion pa e situacion di e pandemia cu a afecta henter mundo. Nos ta gradici Dios pa tur esnan cu a recupera caba di e virus y nos ta keda den oracion pa esnan cu mester recupera ainda. Lamentablemente nos a perde dos ciudadano pa motibo di Covid-19 na Aruba y nos oracion ta cu Dios lo sigui consola e famianan den e dianan nos dilanti. Ningun hende por bisa cu exactitud con nos lo supera e crisis aki. Pero nos ta convenci cu Aruba mester busca cara di Dios pa supera e crisis aki. Salmo 34:17 ta bisa: E hustonan ta sclama y SEÑOR ta tende, y ta libra nan for di tur nan angustianan. Cu Dios bendiciona y sigui guia e dushi pueblo di Aruba.