JERUZALEM, Israel- E iglesia Cristian di Santo Sepulcro di Jeruzalem, diadomingo a cera su portanan como protesta contra di un ley nobo cu lo mester wordo debati den Knesset (parlamento Israel). E norma lo permiti estado Israeli confisca teranan bendi door di iglesianan na inversionistanan priva desde 2010 y lo obliganan pa paga un compensacion na e doñonan nobo.
Na e campaña sistematico contra di e comunidad Cristian na Tera Santo”, tabata palabranan di e patriarca Ortodoxo Griego Teofilo III, despues cu gobierno a congela activonan di e iglesia te ora cu nan paga miyones di shekel na belasting atrasa. Ta trata aki di belasting ariba propiedadnan, manera centronan di religion, shelter pa peregrinonan y scolnan.
E patriarca Ortodoxo, compaña pa e guardian di Tera Santo, Fransesco Patton y e patriarca Armenio Nourhan Manougian, na cabes di e iglesia, a califica e proyecto di ley como “ley discriminatorio y racista”, y el a agrega cu firmeza: ” Nos lo dicidi ki ora y con iglesia lo habri bek”.
E presion di e herarkia eclesiastico tabata efectivo ya cu e decision ariba e ley ya menciona, promovi pa e diputado Rachel Azaria, di e partido centrista Kulanu, a wordo posponi pa e decision di e ministernan, segun e corante The Times of Israel.
Considera pa ortodox y catoliconan como e luga caminda Hesus a wordo crucifica, dera y di unda el a resucita, e iglesia di Santo Sepulcro ta wordo considera como un di e luganan mas sagrado pa Cristiannan.
Fuente: https://www.timesofisrael.com