Icono di moda Karl Lagerfeld a fayece

E legendario diseñado di moda, fotografo y estilista Aleman Karl Lagerfeld a fayece diamars na edad di 85 aña, e corant Frances Le Figaro a informa. E icono mundial di moda, conoci pa su trabao pa e firma Chanel, a fayece despues di cu su salud a deteriora den e ultimo simannan.

Segun e revista Purepeople, e diseñador a fayece despues di a wordo interna di emergencia den e hospital Americano di Paris, situa den e localidad Metropolitano di Neuilly-sur-Seine.

Karl Lagerfeld, tambe yama ‘e Káiser di moda’, a emigra for di Alemania pa Paris na 1953. Tabata na Francia unda cu el a desaroya su carera largo, caminda cu el a colabora cu varios di e casnan grandi di modo y a crea su propio marca. Desde 1983 te cu su fayecimento, el a traha como director artistico di Chanel.
Speculacionnan riba e estado di salud di e diseñador a crea raiz door di su ausencia den e desfile di Alta Costura di Chanel na Paris, dia 22 di januari ultimo. E cas di moda Frances a e tempo ey a splica cu esaki tabata debi na cansancio.

Comments

comments