NEW YORK, Merca- E icono di moda Gloria Vanderbilt, mama di e conocido presentador di noticia di CNN Anderson Cooper, a fayece na edad di 95 aña. Asina CNN aa raporta dialuna. Aparentemente el a muri di cancer di stoma, pa cual el a keda interna den hospital mas prome e luna aki. E tabata modelo, diseñador di moda y actriz. El a fayece dialuna mainta na su cas, rondona pa su famia.
Famia Vanderbilt ta un di e famianan legendario mas rico di Merca. Gloria Vanderbilt ta descendiente di e magnate di ferrocaril Cornelius Vanderbilt. E fortuna familiar, calcula na 200 miyon dollar na final di añanan 1800, gradualmente a baha durante decadanana largo door di gastamento dimas (tanto riba tereno filantropico como gastamento inecesario) y un bahada den e mundo feroviario. Na april 2014, durante un entrevista den e show radial di Howard Stern, Cooper a bisa: ” Mi mama a bisa bon cla, cu no tin herencia”.
INFANCIA
Gloria Vanderbilt a nace den un famia miyonario dia 20 di februari 1925, cu’n herencia di 2.5 miyon dollar (ekivalente na 35miyon dollar awendia). Pero e no tabata tin acceso na e placa aki te cu su 21 aña di edad. Su mama tabata por a saca 50 mil dollar anualmente. Como un muhe di negoshi, Gloria tabata tin un carera como artisa, modelo, dramaturgo y actriz. Tabata den decada di 1970 cu Gloria a traha su mesun placa, cu’n liña di moda di jeans, cu e mes tabata modela den propagandanan cu awendia ta icono.