Recientemente, Sra. Ichelle Simon, Communicatie & PR Adviseur di Directie VolksgezondheidAruba (DVG), desde 1 di november 2017, a gana su caso den corte, cual el a entama contra Land Aruba. Su abogado tabata mr. David Kock. Hues a duna orden pa gobierno tum’e bek den servicio of pag’e Afl. 40.500.
Na 2017, Ichelle Simon a solicita pa e funcion na Directie Volksgezondheid Aruba (DVG) cual funcion el a cuminsa eherce na Directie Volksgezondheid Aruba. Esaki ta despues di a pasa e proceso di solicitud cu exito, cumpliendo cu tur exigencia di Departamento di Recurso Humano.
RETIRO
Tabata ariba 29 di december 2017 cu Prome Minister, mr. Evelyn Wever a manda e Relacionista Publico di DVG un carta, informando su persona cu e ta keda retira for di trabao. Esaki basa ariba e hecho cu e funcion cu funcion cu Sra. Simon a haya tabata politico of cu ta cay bou di e nombracionnan haci den campaña.
Sinembargo, despues di e carta di retiro, e director di DVG a manda un carta pa Minister Dangui Oduber, como e Minister encarga cu Salubridad Publico, apelando pa reconsidera e decision aki mirando cu Simon ta cualifica segun e nivel di estudio, e experiencia y e capacidad pa eherce dicho funcion. Banda di esaki e funcion ta uno hopi importante pa e departamento. Na su turno Minister Oduber a para riba e decision tuma door di Prome Minister y como tal, e peticion no a wordo honra.
CASO
Den e sentencia di Hues, por nota cu ta considera e sugerencia di gobierno cu Ichelle Simon mester perde trabou danki na e “afscheidsbeleid” di e gobierno saliente, como un difamacion. Den e sentencia a subraya cu “Het heeft er dan ook de schijn van dat Simon alleen is ontslagen omdat zij ooit door het Kabinet Eman II in dienst is genomen”. Asina tambe, cu e sentencia di hues aki, Land Aruba (gobierno) mester pone Ichelle Simon bek den su funcion, cu pago di salario retroactivo, entrante 1 di februari 2018.