ANTARTICA- Esaki a wordo anuncia. Despues di a crece cu 17 kilometer mas, entre 25 cu 31 di Mei, segun observacionnan di e specialsitanan di e proyecto MIDAS, un pida di e Plataforma Larsen C den e peninsula di Antartica, a comberti su mes den e iceberg di dimensionnan mas grandi di e ultimo decennia. E tin un total di 5.800 kilometer cuadra, manera confirma door di e Universidad di Swansea y di British Antarctic Survey.
Diaranson, despues di cu e buraco a crece cu 13 kilometer cu tabata falta pa e yega lama, un satelite Mericano a observa e iceberg los ariba lama. Ta ser calcula cu e bloki gigante ta cubri un area di mas o menos 6 mil kilometer cuadra. Esaki ta mas o menos un kwart e tamaño di Wales.
Den un comunicado, expertonan den estudionan Antartico di e Universidad di Wales a indica cu e losmento a tuma luga entre 10 y 12 di Juli, ora cu e iceberg a separa die segmento Larsen C, di e continente blanco.
E iceberg, cu probablemente lo wordo denomina como A68 ta pisa mas di un ton. Cientificonan tabata sperando esaki. E buraco tabata bira mas grandi, durante mas di un decada. E extension di e buraco a bin ta acelerando desde 2014, cual a haci e inminente separacion, inevitabel.
“E iceberg ta un di esunnan mas grandi registra y su futuro progreso ta dificil di predeci”, segun Adrian Luckman, profesor di e Universidad di Swansea y investigador principal di e Proyecto MIDAS, cu a bin ta monitorea e plataforma di ijs durante varios aña.
E iceberg gigante aki ta aumenta e risico pa e barconan, awo cu e la kibra. E peninsula ta pafo di e principal rutanan comercial, pero si e ta un di e principal destinonan di cruceronan cu ta bin for di Suramerica.
Icebergnan grandi ta kibra habitualmente na Antartica, y esaki segun cientificonan, no ta relaciona cu e cambio climatico artificial.
Fuente: www.lavanguardia.com