Esaki ta e siman central pa celebra e “Dia Mundial di Curason”, cu ta diahuebs awor dia 29 di September 2016. IBiSA ta sumamente satisfecho despues cu siman pasa a resulta exitoso cu e proyecto piloto di ‘Salud Activo na St. Paulus School.
Diabierna tabata e ultimo dia di actividad na e school y representantenan di Aruba Heart Foundation tambe tabata presente na e clausura. Sra. Velma Daal, Presidente di e Fundacion hunto cu sra. Sara Marugg y sra. Selimah Maduro, Secretaria y Tesorero respectivamente a haci entrega di e cabuyanan di bula cu e Fundacion ta regalando na diferente school en conexion cu e celebracion di “World Heart Day”. Un total di 600 cabuya di bula a keda reparti entre diferente scol.
Henter siman varios scol ta participa cu actividadnan na nan scol mes pa conscientisa nos muchanan riba e importancia con pa cuida nos curason for di chikito. Tur esaki ta wordo haci den e cuadra di “Dia Mundial di Curason”. Tur aña IBiSA ta invita e scolnan pa tuma parti na e dia, den forma di un actividad of cualkier otro forma di conscientisacion. A keda liber na cada scol pa scoge nan forma di participa.
IBiSA y Aruba Heart Foundation a reuni di antemano pa prepara tur informacion necesario pa cu e tema di e aña aki. E trabou cu ta keda haci en conhunto ta duna sigur su resultado positivo. IBiSA como insituto gubernamental di salud, ta apoya y sostene iniciativanan asina den nos comunidad.