Mision di IBiSA ta pa crea y mantene nos poblacion di Aruba ‘Activo y Saludabel’. Y den e cuadra aki ta prepara y organisa actividad pa diferente grupo den comunidad riba e tereno di actividad fisico, como tambe prevencion y promocion di salud. En conexion cu ‘World Heart Day’ cu tur aña ta riba e fecha di 29 di September, IBiSA tin un programa pa bishita scolnan cu un proyecto piloto di “Salud Activo” specialmente pa nos muchanan.
E proyecto ta consisti di 4 parti, cu ta cuminsa cu un seccion di 30 minuut durante cual ta tuma datonan di peso, haltura y presion di cada mucha. Despues ta sigui cu un formulario cu ta contene 5 pregunta cortico tocante desayuno, e importancia di come fruta, pan bruin y e deporte actual cu e mucha ta practica. Ta sigui otro seccion di 30 minuut na unda cu tur mucha ta haya informacion y demostracion di tarea y importancia di cuido di nan curason. E intencion di esaki ta, pa e muchanan bira mas consciente con nan mes por cuida nan salud. Y finalmente ta cera cu un test fisico di aproximadamente 45 minuut.
Durante e siman di 19 pa 23 di September 2016, IBiSA ta na St. Paulus School na San Nicolas pa atende cu full e scol. IBiSA ta sumamente contento di por haya cooperacion total di e cabesante di scol meneer Randy Arends y tur maestro. Cu anticipacion tambe a pidi permiso di tur mayor pa e participacion di nan yiunan na e proyecto aki, pa cual IBiSA ta gradici mayornan pa e aceptacion.
E meta principal di e proyecto piloto aki ta, pa e muchanan pasa den e experiencia di un test y haya informacion importante tocante cuido di nan propio salud. Pa IBiSA e proyecto ta di gran balor, pa motibo cu ta haya informacion y datonan pa por adapta y mehora e servicionan en general y pa schoolnan en particular.
E prevencion di enfermedad cardiovascular mester inclui e grupo di mucha cu ta atende scolnan basico. E motibo ta cu na un edad hoben ta mas facil pa desaroya conductanan saludabel y duradero den bida di un persona. Ademas, edad escolar ta e momento na unda ta cuminsa e prome cambionan pa produci enfermedad cardiovascular. E grupo di enfermedad aki ta relaciona cu falta di movecion, obesidad y alimentacion no saludabel. Pa e motibo aki e prevencion na edad escolar ta fundamental pa reduci na largo plaso e enfermedadnan di curason riba nos pais.
Pa loke ta trata e resultadonan di St. Paulus School, IBiSA lo haci un ‘follow up’ den forma di un presentacion na maestro y mayornan. Y tambe traha riba un plan di accion pa e casonan cu resulta di riesgo.
IBiSA ta gradici e participacion di St. Paulus School na e proyecto piloto di “Salud Activo” y ta spera di por haya reaccion di mas school pa participa.