Cu e mision pa crea y mantene hobennan activo y saludabel, IBiSA a continua cu e proyecto piloto ‘Salud Activo na Scol’ y e biaha aki a bishita St. Michael School na Brazil. E meta principal di e proyecto ta, pa e muchanan pasa den e experiencia di un test di salud y haya informacion importante tocante cuido di nan propio salud.
Como instituto cu ta promove un estilo di bida saludabel IBiSA a acerca St. Michael School cu e proyecto. Mesora Directiva di e school a reacciona entusiasma y a bay di acuerdo pa e tuma lugar, pa cual a haci tur contacto y preparacion.
Durante e siman aki, Team di Salud y Team di ‘Schoolsport en Recreatie’di IBiSA a duna presentacion na e muchanan di e scol. Tambe a tuma datonan oficial di cada mucha, esta nan peso, haltura y presion. Na final a cera cu e test fisico, cu a tuma lugar den e sala di gimnasio di Tarcisius Kleuterschool. Tur test a bay hopi bon y rapido ya cu e muchanan a participa contento y activamente na cada un. Tur a siña e importancia di biba un bida saludabel y activo y e efecto positivo cu esey tin.
Por bisa cu St. Michael School ta un scol hopi consciente di e problematica di obesidad y ta atende cu esaki entre su alumnonan. Cu e presentacion di IBiSA, esaki sigur ta un compromiso pa e scol sigui traha riba e salud di su alumnonan. IBiSA ta gradici cooperacion di e scol pa participa na e proyecto.