Tur cos ta cla pa e gran evento di e 37 biaha di e Turibana Loop. Edgar Erasmus di IBISA, ta splica mas di e actividad di canamento y coremento cu bo bay tuma luga dia 11 di September. Esaki lo cuminsa pa 6’or di mainta. E careda aki ta uno hopi conoci pa e pueblo di Aruba y aña pasa e careda aki a conoce algun cambio. Tabata tin cambio den ruta y tambe den parti di distancia. E ruta a bira 10.5 kilometer y e careda mes a bin concentra den e bario di Noord. Esey tabata e cambionan cu tabata tin aña pasa y e aña aki ta continua cu e careda den bario di Noord. Sigur e careda aki ta hopi gusta pa pueblo di Aruba. For di awor aki caba ta manda invitacion pa pueblo di Aruba pa bin participa na e careda aki. E careda mes lo tuma luga dia 11 di september, manera ya menciona y inscripcionnan ta tumando luga na Ibisa. Por inscribi for di 8’or di mainta te cu 12’or di merdia y despues di 1’or te cu 4’or dia tardi. Entrante dialuna awo, por inscribi na Ibisa San Nicolas tambe, mesun orarionan y na Ibisa Oranjestad, esaki por dialuna y diamars, por inscribi for di 8’or di mainta non-stop te cu 8’or di anochi y merdia entre 12’or y 1’or di merdia ta keda habri pa tuma inscripcion.
Ya caba tur cos, bib nummers ta cla, tshirtnan ta cla y tambe trofeonan ta na caminda. Ora di inscribi ta haya tur esakinan. Segun Erasmus, loke ta keda awor aki ta pa yega y participa na e careda aki.
Ta gradici MFA cu aña pasa a habri porta pa warda materialnan y mainta tempran por a haci uzo di e luga pa e hendenan por check in na tempo. E aña aki tambe nan ta apoyando cu e careda di Turibana.
E registracion mainta tempran ta cuminsa for di 5’or di mainta y pa 6’or e careda lo start, esaki ta riba dia di e careda.
Den e ultimo añanan, e caredanan sea di 10 kilometer of halfmarathon, e interes ta asina grandi cu den tur careda ta haya hopi hende ta participa.
E interes pa careda na pia ta hopi grandi, segun Erasmus.
Pa loke ta e careda di Turibana, por tumat e cu 600 hende, esey tin di haber cu siguridad riba caminda y e manpower planning pa sigura e siguridad di cada persona den e careda.
Tambe Tito Luidens a splica riba e Ruta di e Turibana Loop cu lo cuminsa na MFA Noord bay te cabes di Aruba.
E ruta ta como lo siguiente: Ta sali for di MFA Noord, ta bay direccion panort. Ta yega te cu Tucsany Residence na man robes, sigui e caminda straight yega te na e rotonde di Marriott Hotel. Esaki ta hopi importante. Na e rotonde eynan ta bay tin e prome waterpost. For di eynan ta bay nort. Ta haci enfasis riba esaki. No ta bay zuid. Ta yega te na e crusada di Boca Catalina unda e di dos waterpost ta bay ta. Ta sigui bay te Tierra del Sol yega te caminda di Westpunt, na e crusada, eynan ta bay tin e di tres waterpost. For di eynan, te na MFA e careda ta termina.
E caminda pa e coredonan ta hopi faborabel. No tin sero, no tin nada. E careda aki ta pa coredornan so, segun Luidens. Por bin pa cana tambe. No ta stroba ningun hende. Una bes cu bo ta move, pa Ibisa ta importante. E proceso di inscripcion ta mesun cos cu e coredornan. Unico cos cu nan ta dura un tiki mas pa yega na e punto final.
Den e parti eynan a papia cu Cuerpo Policial, pa nan ta na altura di tur esaki, pa asina compaña e coredo/canadonan.