Diabetes ta un enfermedad cronico cu ta afecta hopi hende na Aruba y tur aña e partnernan di e plataforma pa promocion di salud ta organisa diferente esfuerso durante di henter un siman rond di dia mundial di diabetes, pa conscientisa comunidad tocante di prevencion di diabetes, como tambe e parti di prevencion di complicacionnan cu por bin cu e enfermedad.
IBISA a organisa e tradicional caminata y expandiendo riba e tema di e aña aki, esta “Wowo riba Diabetes” a agrega e servicio di chekeo di wowo riba Bus di Salud pa algun siman. E chekeonan aki ta wordo realisa cu cooperacion di parti di dos optica.
Dr. Sharline Vis, kende ta dokter di cas na Savaneta, a splica durante di e caminata cu movecion ta parti di un estilo di bida saludabel, combina cu bon nutricion. Movecion ta esencial particularmente pa personanan cu tin Diabetes Tipo 2, como cu e ta cuminsa door cu e curpa tin problemanan di produccion y resistencia pa uza insulina. E curpa cu tin hopi vet y peso, specialmente vet na bariga, ta wordo afecta mas.
Remedi ta importante, pero e estilo di bida tambe merece hopi atencion, segun dr. Vis ta splica. E ta boga pa por lo menos 30 minuut di movecion pa dia, cinco dia pa siman. Cuminsa poco poco, cu canamento, y sigui amplia e regimen di movecion na midi cu e curpa ta custumbra. Mainta ta miho tempo di dia pa haci movecion, como cu e ta miho pa e metabolismo, dr. Vis ta laga sa.
El a remarca cu e ta mira un mehoracion den e parti aki na Aruba, pues cu tin mas hende ta cana y core na Linear Park y ora cu e mes bay Parke Curason banda di 5’or di mainta ya e parke ta yen tambe di personanan cu ta moviendo. “Tin un cambio di mentalidad,” el a agrega. Pa na prome luga preveni enfermedad y si tin’e siña maneha pa preveni complicacion a remarca cu e prome paso ta pa preveni malesa pa medio di un miho estilo di bida, esta move suficiente y come saludabel. E di dos paso ta pa si of ora e persona haya diabetes pa via di cualkier circunstancia, e siña cuido su mes mas bon posibel; aki prevencion di complicacion ta bira e enfoke.
E wowonan ta organonan cu por experencia complicacionnan di diabetes y ta esencial pa detecta cualkier cambio mas tempran posibel. Cu e asistencia di dos optica, Bus di Salud ta agrega e servicio aki pa algun siman pa asina yuda den e parti di deteccion tempran, pero ta pone enfasis adicional riba e factor “control” y e conscientisacion pa cu posibel problemanan cu wowo.
Van Embden ta splica cu tur hende conoce un persona cu diabetes y por mira con e condicion aki ta afecta e bida di e persona, y su famia. Diabetes ta afecta e calidad di bida, y p’esey mes ta pidi comunidad pa yuda den e parti di prevencion, cerca yiunan, nietonan y otro sernan keri.
Diabetes ta un enfermedad cronico cu por wordo preveni den hopi caso y controla y aunke ta zona facil ora bisa esaki ta importante pa comunidad realisa cu cada persona por contribui na e prevencion tanto di e enfermedad como di su complicacionnan.