Ibisa, COA y Aruba Bank ta celebra Olympic Day dia 15 di juni 2019

IBiSA, Comite Olimpico Arubano y Aruba Bank ta celebra “Olympic Day 2019” diasabra 15 di juni na Parkeerplaats di Aruba Bank Camacuri.

Riba e dia aki por conta cu participacion muchanan representando nan school den e careda di 1, 2 y 3 kilometer. E reaccion pa e competencia entre nos muchanan den e careda aki, ta sumamente grandi.

IBiSA ta haci un apelacion y recordatorio na tur mayor pa e muchanan t’ey presente pa 6.00 a.m. na Aruba Bank Camacuri pa busca nan Bib number, E careda mes ta start pa 7:00 a.m. E muchanan tin cu acudi na e mesa di registracion riba cual ta indica e catagoria den cual e ta bay core.

Prome cu e careda, tur mucha ta ricibi tambe un T-Shirt di ‘Olympic Day’. Lo ta preferi pa e muchanan lo bisto e T-shirt durante e actividad. E area ta solamente pa participante, pa cual ta pidi mayor y docentenan pa ubica nan mes riba e ruta di e careda pa apoya e muchanan.

Debi na e cantidad di 500 participante, e caredanan ta bay tuma luga den e sistema di ‘heat’ (den grupo), y e miho tempo overall di e prome 3 luga den cada categoria di edad pa tanto mucha muher como mucha homber ta esunnan cu ta wordo premia cu medaya. Tur mayor ta invita pa bin apoya e muchanan den nan competencia.

Despues di 1,2,3K tin mas actividad riba programa manera “Meet the Top Athletes” , demonstracion di diferente deporte y un kids corner, un mainta yen di actividad di awa. Nos kier recorda tur mayor pa bin cu paña extra pa asina e muchanan por disfruta di e waterpark.

IBiSA, COA y Aruba Bank ta conta riba un asistencia grandi pa celebra “Olympic Day 2019”.

Comments

comments