Instituto Biba Saludabel y Activo, IBiSA su departamento di Deporte Escolar a prepara e calendario di competencia di Deporte Escolar pa e aña escolar nobo cu a caba di cuminsa. Tur school di Enseñansa Basico y di Enseñansa Avansa a ricibi e respectivo poster y pakete di informacion, di tal forma cu por cuminsa prepara nan alumnonan pa e competencia entre e schoolnan.
Enseñansa Basico:
E competencia entre scolnan di Enseñansa Basico ta cuminsa den e deporte di ‘Trefbal’. E competencia ta den categoria A y B meisjes. E scolnan cu ta participa na e competencia escolar di trefbal organisa pa IBiSA tin te cu dia 4 di september pa inscribi nan participacion. E weganan ta cuminsa dia 18 di september 2017. E competencia di weganan pa schoolnan di Enseñansa Basico ta parti den cuatro sector, cu ta Sector Noord, Sector Oranjestad, Sector Sta. Cruz y Sector San Nicolas.
Enseñansa Avansa:
Pa e scolnan di Enseñansa Avansa e disciplina den cual ta inicia cu weganan ta ‘Basketbal’. E competencia di Basketbal ta pa VO Jongens Ultimo dia cu scolnan por inscribi nan participacion na e weganan organisa pa IBiSA ta dia 25 di september 2017. E weganan ta cuminsa den luna di oktober. Pa scolnan di Enseñansa Avansa e competencia ta den parti den 2 sector, cu ta Sector Pariba di Brug y Sector Pabou di Brug.
IBiSA ta invita tur school pa inscribi na tempo nan participacion na e competencianan di ‘Deporte Escolar’ cu ta keda organisa durante e aña escolar aki. Deporte ta un forma di recreacion positivo cu ta yuda muchanan y hobennan den e desaroyo di nan estudio. Alabes ta yuda nan keda activo den movecion y hiba un estilo di bida saludabel. IBiSA cu animo ta anticipa un participacion grandi di tur school e aña escolar aki.
Pa cualkier informacion adicional por tuma contacto libremente cu oficina di IBiSA su departamento di ‘Deporte Escolar’ na telefoon 582 4987.