Hyatt Place Airport Hotel ta habri su porta oficial!

Diamars mainta minister di Turismo sr. Dangui Oduber tabata presente na e ceremonia di e apertura oficial di Hyatt Place Airport Hotel caminda e mandatario a hiba palabra. E mandatario a menciona su cu e ta hopi satisfecho y orguyoso cu e resultado final di e proyecto despues di lunanan di construccion.

“Hyatt Place Airport Hotel ta e prome hotel den sercania di Aruba Reina Beatrix International Airport. E hotel aki a pone Aruba na prome lugar for di e punto di bista cu 42 di nan 43 empleadonan ta local. Asina ta mustra e confiansa cu e hotel tin den nos hendenan local, e persona na cabes di e hotel esta e General Manager ta den persona di sra. Marta Raven” asina e mandatario a expresa deseando sra. Raven tur clase di exito pa cu su reto nobo como General Manager.

Segun Minister Dangui Oduber, e inversionistanan ta hincando un cantidad cuantioso den nos economia, un inversion di 50 miyon di dollar. Minister Dangui Oduber: “E confiansa cu tin den pais Aruba como producto ta notabel. Un inversion di e magnitud aki ta bin solamente ora cu bo por demostra di tin e capacidad y cu como gobierno bo ta hibando un maneho coherente.” E hotel aki ta conta cu 116 camber y tin diferente comodidad manera un picina, ballroom, espacio pa haci reunion y mucho mas.

Tabata 23 di October di aña 1990 ora cu e cadena di hotel Hyatt a habri su prome hotel na Aruba. E temporada ey Hyatt Regency Hotel a habri su porta y tabata ex minister president sr Nelson Oduber cu a duna e discurso di apertura ceremonial. Awe casi 29 aña despues su yui y actual Minister di Turismo sr Dangui Oduber tambe tabata tin e previlegio aki cu Hyatt Place Airport Hotel, sigur un bunita coincidencia.

Finalmente e mandatario a gradici e inversionistanan pa demostra confiansa den pais Aruba y a desea e staff y personal tur clase di exito pa cu nan reto nobo.

Comments

comments