Recientemente un panel di experto a haya e tarea dificil di califica e proyectonan cu a wordo entrega pa cu e iniciativa di Santa Rosa/DLVV cu tin como nomber “Hofi Amistad”.
E tabata un trabou dificil pero sigur hopi satisfactorio pa esunnan cu a acepta e trabou aki.
Huradonan tabata Sra. Tirzanne Cordeiro-Williams, juf. Desiree Correa, Sra. Lisette Tromp-Thijsen, Sr. Boey Marchena, Sr. James Ocalia y di Santa Rosa Sr. Ludwig Rasmijn. E calificacion a bay den super bon ambiente y e huradonan a keda asombra di mira e creatividad cu e muchanan di scol basico a presenta den nan proyecto.
Directora di Santa Rosa/DLVV, Sra. Nathalie Maduro ta hopi satisfecho di e reaccion cu a haya for di e diferente scolnan cu a participa den e proyecto Hofi Amistad. Tabatin un cantidad di 11 scol cu a participa e aña aki y ta spera cu e proyecto aki lo sigui crece, como cu e lo ta un incentivo cu Santa Rosa lo duna e scolnan tur aña. Sra. Maduro tin e siguransa cu pa e siguiente añanan e proyecto Hofi Amistad lo tin un acogida total den e diferente scolnan basico di Aruba.
E proyecto ganado lo wordo anuncia den e prome siman di mei y un di e premionan lo ta cu Santa Rosa mes lo guia y apoya e scol ganado den e construccion y mantencion di nan Hofi Amistad.