E yiu homber di e presidente Mericano, Hunter Biden, a wordo declara culpabel di 3 cargo federal pa delito relaciona cu posesion di arma di candela, segun e veredicto di hurado. E acusado a nenga tur e acusacionnan.
Hunter Biden por enfrenta un pena maximo di 25 aña den prison, mientras cu cada cargo tambe tin un mula maximo di 250 mil dollar. No obstante, e expertonan ta indica cu e personanan cu alta di antecedente penal no sa ricibi e pena maximo.
Te asina leu, no ta conoce riba ki fecha lo duna sentencia.
Ta trata di e prome biaha den historia di Merca cu e yiu homber di un presidente den funcion, ta wordo enhuicia.
Dos di e cargonan ta coresponde na acusacion caminda cu yiu di Joe Biden a presenta un formulario caminda cu e ta sigura cu e no tabata consumiendo droga ilegal na momento di cumpra un revolver Colt Coba na october di 2018. E di tres acusacion ta indica cu e tabatin un arma di candela mientras cu e tabata consumi narcotica.
Reaccion di Hunter Biden
Hunter Biden a expresa su gratitud na su famia y su casa, Melissa Cohen Biden: “Awe mi ta mas gradicido p’e amor y sosten cu mi a ricibi siman pasa fo’i Melissa, mi famia, mi amigonan y mi comunidad, cu a keda decepciona p’e resultado,” el a sostene.
E abogado di e yiu di e presidente, Abbe Lowell, a indica cu nan sinti “decepciona” p’e veredicto y cu nan lo persigui “energicamente tur e recursonan legal disponibe.”
Joe Biden “lo acepta e resultado”
Door di ta cargo federal, Joe Biden lo tin e poder pa absolve su yiu homber den cualkier momento, pero e propio presidente a declara siman pasa cu e no tin pensa di hacie. Comentando n’e decision di hurado, Joe Biden a destaca cu e stima su yiu y cu e famia ta “hopi orguyoso di e homber cu e ta awe.” “Como tambe i a bisa siman pasa, mi lo acepta e resultado di e caso aki y mi lo sigui respeta e proceso hudicial mientras cu Hunter lo considera un apelacion,” el a agrega.