E paisnan y entidadnan publico cu ta forma parti di Reino Hulandes kier pa tur mucha y hoben den Reino lanta saludabel, den un ambiente sigur y cu amplio oportunidad pa nan desaroya nan mes. P’esey nan a firma un “Memorandum of Understanding” (MoU), pa stimula colaboracion riba tereno di derecho di mucha. Den e acuerdo di colaboracion aki, 7 punto ta para central: educacion positivo, prevencion di maltrato di mucha, desaroyo di “safetynets” (contenido pa tempo liber despues di scol), participacion di mucha y hoben, asistencia profesional, sosten di mucha y famianan y atencion special pa muchanan vulnerabel. E MoU ta bira realidad despues di un declaracion di intencion cu 7 mandatario a firma na Corsou, durante e di tres conferencia di e Taskforce di Reino encarga cu derecho di mucha.
For di seis rapport di Unicef titula “Muchanan den Reino: derecho di mucha den Reino Hulandes”, a sali na cla di forma convincente cu medidanan adicional ta sumamente necesario, pa por mehora derecho di mucha na e seis islanan cu tabata forma Antias Hulandes. Colaboracion y comparti conocimento entre e isla y paisnan den Reino ta esencial pa por logra esaki.
Durante e Conferencia di Reino di 2 di april 2014 na Aruba, mandatarionan a reitera cu cada mucha den Reino tin derecho riba un bon infancia y hubentud, manera e Tratado Internacional tocante Derecho di Mucha (IVRK pa su abreviacion na hulandes) ta stipula. Durante e conferencia a dicidi pa institui e Taskforce di Reino encarga cu Derecho di Mucha, cu tin como tarea pa stimula colaboracion den Reino riba tereno di derecho di mucha.
Durante e conferencia di e Taskforce, cu a tuma luga di 14 pa 16 di mei 2018 na Corsou, mandatarionan responsabel pa mucha y famia di e cuater paisnan y tres entidadnan publico den Reino, a firma un declaracion di intencion. E declaracion di intencion aki tabatin como meta pa fortalece colaboracion riba nivel di gobernacion tambe. Esaki pues a bin conduci na firmamento di e MoU, cu Reino a publica riba Dia Internacional di Derecho di Mucha.
E MoU ta describi e responsabilidadnan cu tur partido tin di forma individual, pa asina fortalece cumplimento cu e Tratado tocante Derecho di Mucha na nan isla of pais. Tambe e documento ta describi e shete puntonan, basa riba cual lo colabora na nivel di gobernacion. Comparti conocimento y experiencia ta indispensabel den esaki.