Kralendijk – Wereld Natuur Fonds (WWF-NL) ta kontentu ku e sosten finansiero adishonal di Nationale Postcode Loterij pa Dutch Caribbean Nature Alliance (DCNA). Ku esaki por realisá un programa kordiná den e parti Karibense di e Reino, ku ta fortalesé proyekto eksistente i ta mehorá koperashon. E inisiativa akí ta kontribuí na e ambishon di WWF-NL pa realisá mas programa regional ku tin un impaktu mas grandi riba restourashon di naturalesa i resilensia klimátiko.
Programa Regional pa Resilensia Klimátiko
E proyekto di tres aña ‘Conservation and Restoration of Key Habitats’ tin komo meta pa mehorá e resilensia klimátiko di e área Karibense. Por logra esaki dor di kordiná esfuerso lokal pa protehé i restourá mondi na kosta, palunan di mangel, yerba di laman i refnan di koral. Dor di integrá proyektonan bou di un programa regional, gastonan ta bai abou, efisiensia ta subi i e impakto ta krese konsiderabelmente. E programa akí ta dirigí pa DCNA, ku sosten di WWF-NL riba konosementu i finansiero.
Kontribushon di WWF-NL
WWF-NL ta kontribuí ku konosementu balioso i eksperensia for di e ret WW internashonal, ku ta inkluí eksperensia di restourashon di kosta na Colombia, koperashon ku Global Mangrove Alliance i otro eksperensia den e ret mundial di WWF. E inisiativa akí ta yuda esnan ku ta ehekutá proyekto na e seis islanan Karibense pa kompartí ‘best practice’s i fortalesé e inisiativanan lokalnan di restourashon. E meta final ta krea áreanan na kosta ku ta resistente den tur regionnan Karibense kaminda WWF-NL ta aktivo. “Koperashon ta clave,” segun Monique de Water, mènedjer di programa di WWF-NL pa e programa Dutch Caribbean. “Dor di uni e esfuersonan, nos por logra mas impakto mientras ku nos ta fortalesé i harmonisá programanan eksistente.”
Edukashon i Kambio di maneho
Banda di restourashon di naturalesa, e programa ta enfoká riba amplia konsientisashon riba e importansia di áreanan natural. Esaki ta logra ku programa edukativo, publikashonnan i aktividatnan di kontakto ku komunidat. Ademas, DCNA ta traha huntu ku WWF-NL, gobièrnonan i otro partinan interesá pa mehorá maneho, segurá finansa i krea un struktura legal pa kostanan resistente ku tin benefisio pa naturalesa i hende riba un término largu.
