CARACAS, Venezuela- Cu paketenan di cuminda y tur sorto di toelage, Maduro ta trek e poblacion pa bay vota.
Situacion penoso
Den e cas di Vanessa Avila e holo di pushi y nan sushi ta penetrante. Riba un cama banda di un mucha chikito, ta wak un pushi extremadamente flaco, ta spin, di mas contento di dje. Avila (23) ta den super contento. El a caba di retira for di banco su toelage di Hogar di Patria. “Mi a cumpra mango y un paar di tablet di iboprufen cu e placa”, Avila ta declara. Cu esey, e 1.5 miyon boliver (mas o menos 3 dollar) a caba tambe. E bon ta cu e tin un bonus pa Dia di Mama ainda pa haya, y tambe e 700 mil bolivar cu e president a priminti nan pa Dia di Obrero. E bonus di Carnaval y di Pasco Grandi a caba caba. “Sin e placa extra aki, lo mi no por sobrevivi”. Vanessa Avila ta mama soltera, di 5 yiu.
Pio crisis den su historia
E socialsita Nicolas Maduro, na 2013 a asumi e presidencia di e pais y a manda e pais den un abismo sin precedente. E pais ta pasando den un di su pio momentonan financiero den su historia, cu’n hyperinflacion nunca antes bisto. Venezuela tin e reserva petrolero mas grandi di mundo, pero su pais ta muriendo di hamber. Hospitalnan no tin ni clechi mucho menos inyeccionnan, pa no papia mes di remedi. Mas di 80% di e poblacion ta bibando den pobresa extremo, unda cu diariament 5 mil Venezolano ta huy di e pais.
Pero asina mes, Vanessa Avila diadomingo ta vota pa Maduro y su proyecto socialista, mescos cu miyones di Venezolanonan. Den tur e encuestanan, Maduro ta confortablemente dilanti, compara cu su rival di mas grandi, Henri Falcon. Tur cos ta mustra cu e presidente odia pa 80% di e pueblo, toch lo gana un otro mandato di seis aña. Con esey por ta posibel?
Riba televsion estatal Maduro ta grita door di e microphone: “Boso kier mantene boso Carnet de La Patria”? Un publico grandi ta grita Siii mientras nan ta zwaai cu nan carnet den laira. “Boso kier mantene boso pakete di cuminda y bonusnan?”, Maduro ta puntra na su simpatisantenan. “Boso zorg pa vota pami”.
Ultimo recurso
E Carnet de La Patria ta duna e ciudadano derecho na tur sorto di toelagenan. Vooral esunnan di mas pober tin miedo di perde e ultimo speransa aki. E pensioen, tur sorto di beneficio, bonus, bonus di hogar, extra entrada durante Pasco y otro dianan di fiesta. Door di e hyperinflacion, nan no por cumpra casi nada mas cu e placac aki. Pero asina mes nan ta afera nan mes na e migajanan cu Maduro ta tira pa nan. “Miho algo cu nada”, segun Avila ta bisa.
Avila ta biba na Petare, e bario mas grandi di Caracas y Latino America. Su cas ta ariba e cero, den un caya caminda cu tur sorto di bestia ta pasa den e sushinan. Mescos cu Avila e bisiñanan tambe ta ricibi e caha di CLAP iregularmente. Cu un briyo den su wowonan e ta expresa ‘E luna aki a bin dos. Esey ta door di e eleccionnan’.
Na 2016 Maduro a instala e Comite di Alimento Popular, y e paketenan aki di cuminda ta mantene famianan completo ariba pia. Ariba e cahaha tin imagen di Maduro y di Chavez, e tata di e Revolucion Bolivariano. Oposicion kier kita e cahanan di CLAP for di nos”, Pedro Key ta bisa. E ta responsabel di e distribucion di e cahanan di CLAP na Petare. “Sin e cahanan, e situacion lo bira mas pio akinan”.
Key ta reproduci sistematicamente loke e ta skucha diariamente ariba e medionan di comunicacion estatal. “Oposicion lo entrega nos pais na Merca”, e ta bisa. “Nan lo kita nos petroleo for di nos y lo pone un stop na tur e programanan social”. E ta mustra e contenido di e caha di CLAP. “E luna aki tin tuna den dje”, e ta constata alegremente. E ta sigui busca entre aroz blanco, sucu, azeta, boonchi, hariña, mayonaisse y tomati di boter. “E luna aki tin cuater bleki di tuna, esey ta hopi mes!”.
E cariñitonan aki di Maduro ta efectivo, pero no ta e motibo principal pa cual e lo gana e eleccionnan di diadomingo. Ironicamente, Maduro tin di gradici e coalicion opositor MUD (Mesa de la Unidad Democratica). MUD a boycotia e eleccion y a pidi e poblacion pa haci esaki tambe. Hopi Venezolano a duna oido na e peticion aki. Cayanan di e ciudadnan mas importante ta mustra desola.
Mashin di propaganda
E boycott di oposicion ta duna Maduro, e caminda liber pa hiba su mesun hendenan pa e centronan di votacion. Diez por Uno ta e sistema cu pa añanna caba ta den funcion. Cada miembro di partido of un ambtenaar mester trece un persona pa bin vota. Ta mantene un lista pa asina wak si esaki enberdad a tuma luga. “Mi ta duna y boso ta duna”, Maduro ta grita den tono menasante den convocacionnan.
Ta di spera kico lo sali for di e eleccionnan aki,cu ta un cortina di humo pa Maduro y su gobierno. Sea cual sea e manera, nan mester gana. Cu’n oposicion dividi, Maduro tin e caminda hancho habri su dilanti pa gana e eleccionnan aki.