E humanitarionan di Nacionnan Uni a bisa diamars cu nan lo sigui entrega ayudo den un Haiti tenso y volatil, caminda scol, hospital y edificio di gobierno ta bao atake, segun un articulo riba e website di noticia Xinhua.
Hopi a limita nan operacion den e capital Port-au-Prince. E compania publico di electricidad a raporta diadomingo e destruccion di varios substacion den e area metropolitano di e capital, a laga algun region sin coriente, OCHA (Oficina di Coordinacion di Ayudo Humanitario di Nacionnan Uni) a bisa.
“A pesar di e situacion tenso, Nacionnan Uni y nos partnernan humanitario lo sigui entrega ayudo na Haiti,” OCHA a bisa.
E humanitarionan a bisa cu UNICEF y nan partnernan a entrega mas cu 242 mil galon di awa for di comienso di maart, mientras cu e Programa Mundial di Cuminda y nan partnernan a yuda cu mas di 146 mil cuminda cayente. E humanitarionan a duna sosten psicosocial n’esunnan traumatisa p’e bida di violencia.
Sinembargo, e oficina a bisa cu e sector di salubridad ta luchando contra e falta di suministro medico, trahado di cuido di salud y sanger.
“Nos coleganan humanitario ta bisa nos cu hospital Bernard Mevs na Port-au-Prince gradualmente lo bay reanuda su actividadnan, danki n’e sosten di e Organisacion Mundial di Salud y e Organisacion Panamericano di Salud cu provision di remedi y ekipo medico,” OCHA a bisa, añadiendo cu un stock di anestesia a wordo duna na dos otro hospital situa den Port-au-Prince.
E humanitarionan a indica cu e plan di respons humanitario di 674 miyon dollar pa Haiti a aumenta pa funda un nivel di financiamento di 6.5 porciento.
“Esey ta keda leu for di e suficiente pa respons n’e escala di necesidad cu nan tin mester. Urgentemente nos tin mester di mas sosten,” e humanitarionan a bisa.
