Segun e experto, Planta Tera ta constantemente exponi na impactonan di asteroids, constante contacto cu rayonan gamma y tormentanan solar. Un aviso nobo riba destino cu Planeta Tera lo sufri a wordo haci pa e cientifico Polaco, Weronika Sliwa di e “Planetario Del Centro Cientifico Copernico” na Varsovia, kende a avisa cu humanidad mester traslada su mes pa otro planetanan den e sistema solar manera ta e caso di Planeta Mars por ehempel, prome cu esaki bira demasiado laat. Pa e experto, e principal menaza ta e impacto di asteroids, contacto constante di rayonan gamma y tormentanan solar. “Nos planeta ta den peliger di sufri varios catastrofe cosmico y fenomenonan cu por aparece di sorpresa. Lo ta bon si humanidad, poco poco, cuminsa pensa na move pa otro planetanan di e sistema solar y kizas mas despues move bai mas leu tambe”, e experto a declara. Sinembargo, e astronomo ta consciente cu pa e cos aki sosode, lo rekeri un mision sumamente grandi cu hopi risico pa e tripulacion y mas ainda e lo tin un costo hopi halto. “E lo costa mas di loke cualkier Gobierno ta dispuesto pa paga”, e astronomo a sigui bisa. E ta convenci si cu actualmente ta existi e capacidad technologico suficiente pa manda un mision pa Planeta Marte. “Desde e punto di bista comercial, pa awo, e no ta rendabel e tipo di mision aki, pero basicamente ningun mision di e indole aki cu wordo haci pa prome biaha ta rendabe”, e astronomo a declara.