Personanan cu ta huma mas di un paki di sigaria pa dia ta core e risico mas grandi di perde e capacidad di distingui color of di perde nan bista den nan biehes. Esaki ta segun un estudio publica pa Psychiatry Research.
Un grupo di investigadonan di e Laboratorio di Percepcion, Neurologia y Conducta di e Universida di Sao Paolo, Brazil a studia 71 persona sano cu a huma menos di 15 sigaria den nan vida y na 63 cu tabata huma al menos 20 sigaria. Personanan di ambos grupo nan edad tabata varia di entre 25 y 45 aña di edad y nan nunca a wordo diagnostica cu problemanan di vision.
Cientificonan a analisa con e participantenan ta distingui e nivel di contraste y e colornan mediante un programa special cu tabata mustranan brevemente den un pantaya rechthoeknan cu strepi of di color, como tambe un serie di figuranan geometrico compone pa un variedad di circulonan di varios color.
E analisis a revela diferencianan significativo den e vision di e humadonan y esunnan cu ta abstene. Den un promedio, humadonan tabata distingui cu contrastenan cu e dobel di frecuencia y tabata detecta dos of tres biaha mas figura geometrico cu e humadonan.
“Estudionan anterior a señala cu huma a largo plaso ta duplica e risico di degeneracion macular relaciona cu e edad y cu ta un factor cu ta causa cu e blanco di wowo ta bira geel y inflamacion cristalino. Nos resultadonan ta indica cu e uzo excesivo di sigaria of e exposicion cronico na su componentenan ta afecta e distincion visual”, Steven Silverstein, co-autor di e Rutgers University (Merca).
Aunke e investigacion no a proporciona splicacion fisiologico di e resultadonan, Silverstein a admiti cu, ya cu e nicotina a daña e sistema vascular, lo por perhudica e adernan y e neuronanan den e retina.