Hulpbestuurskantoornan rond di Aruba ta bay cuminsa cu modernisacion di nan ekipo di IT. Pa e motibo aki, tur Hulpbestuurskantoor (HBK) ta cera nan porta cuminsando dia 30 di November te 7 di December 2016. E proyecto di modernisacion di e sistema di IT di e oficinanan auxiliar di gobierno tin dos aña caba ta trahando riba dje y a yega e momento di ehecucion, segun ehecutivo di Ministerio di Asuntonan General, Omar Harms a duna di conoce.
“Manera hopi hende a experencia, lastimamente e ultimo añanan, hopi biaha tin problema na e Hulpbestuurskantoornan cu nan sistema ta down,” Harms cu ta supervisa e oficinanan auxiliar di gobierno a splica. El a agrega tambe cu, aunke e periodo cu ta haci’e ta un periodo druk, “finalmente e ta pa por duna un miho servicio.”
Harms a duna di conoce cu e sistema di computer cu ta uzando na e momentonan aki ta consisti di computernan hopi bieu. Hunto cu e proyecto di MFA-nan, caminda ta pone un miho infrastructura pa entre otro e HBKnan por funciona mas eficiente y den un ambiente mas apropia, e departamento di IT tambe tin di bay hunto cu e adelanto aki.
Harms ta pidi comprension y cooperacion di tur cliente pa e proceso aki por tuma luga. Si mester haci pago durante e periodo di 30 di November pa 7 di December, por haci esaki na banconan of si ta coriente of awa, por acudi na e respectivo companianan di utilidad.
E motibo cu ta haci e trabounan importante aki, durante un periodo relativamente druk, ta dos. Expertonan for di Hulanda ta forma parti di e proyecto aki y tambe e proyecto ta bay man den man cu un otro proyecto grandi di renobacion di sistema di IT di Censo. “Esey ta algun di e motibonan cu nos no por a scoge otro fecha pa e trabounan aki.”
Harms, a informa tambe cu despues di e periodo di instalacion di nan sistema di IT nobo, HBKnan ta cuminsa cu servicio di 3 cahero. “Na e momentonan aki tin HBK cu tabata uza solamente 2 cahera, tur awor aki ta bay uza 3 caha, caminda cu bo por duna un miho servicio y mas lihe.”