E pakete di cuminda cu aworaki ta na encargo di Rode Kruis, lo pasa pa responsabilidad di Gobierno entrante prome di juli. E placa pa financia den e proximo lunanan t’ey caba, segun Prome Minister Wever Croes a splica den conferencia di prensa di gobierno dialuna mainta.
Esaki ta un proyecto financia door di Hulanda for di aña pasa. Durante e ultimo bishita di Secretario di Estado Raymond Knops, el a informa cu den zomer nan lo stop cu esaki y e lo bira un responsabilidad di pais Aruba.
Den e conferencia mainta, Prome Minister a splica “nos lo no laga e hendenan aki na caya. Nos ta trahando riba esaka pa tur hende cu ta depende di e pakete di cuminda den lunadi juni ainda, sigui hay’e na juli tambe.”
E ayudo aki via di Rode Kruis ta sigui te cu dia 30 di juni awo. E ayudo pa lunanan di juli, augustus y september, ainda ta placa cu Hulanda ta regalando Aruba. “E ta un gasto di Hulanda pero cu gobierno di Aruba ta ehecuta. Pero despues di esey nos mes mester bay paga pa esaki. Esey ta trahando riba dje, pasobra nos no ta bay laga ningun hende riba caya.”
Lo por tin exigencianan, manera tur esnan cu mester di ayudo aki lo mester registra. E meta na final ta pa ningun hende keda sin haya ayudo.
Pa loke ta FASE y Subsidio di Salario, lo sigui na vigor. Subsidio di salario ta un programa pa doñonan di trabou mantene nan empleado den servicio y Hulanda lo sigui financia esaki. FASE sinembargo ta algo diferente. Esaki ta algo cu Aruba mes a bini cu ne ora cu e crisis a surgi y pa evita cu e hendenan ta keda sin nada, a ini cu ne. Ta busca un forma, segun e mandatario, pa transforma FASE den algo mas structural. E grupo aki mester haya un sosten pa para riba nan pia y haya un trabou bek. “No tin riesgo cu FASE ta stop. E lo sigui tanten cu ta necesario.”
E cortamento di salario di 12.6% riba ordo di Hulanda ta ‘tot nader orde”. E vakanteuitkering ta wordo paga na juni, pues 50% di esaki manera a palabra. Pa loke ta e 5%, e otro islanan a bay di acuerdo pa entrega nan vakantieuitkering completo pa no mester entrega 5% di nan salario tur luna y a entrega algun dianan di vakantie. Aruba basa riba esaki ta haciendo un evaluacion con por cambia e parti di 5%. En bes di entrega e 5% aki tur luna, lo por entrega dianan di vakantie.
No por kita nada di esakinan sin mas for di mesa. Si kita nan, lo haya un carta mescos cu Corsou y Sint Maarten.
Tur placa presta di Hulanda, mester cuminsa paga esaki bek na april, 2022. E ora lo por cuminsa papia si un parti por wordo transforma den un tipo di “grant”.