Dialuna anochi Minister di Salubridad Publico Dangui Oduber a informa cu Hulanda ta bay manda ayudo pa Aruba. Ta papia aki di profesionalnan den cuido intensive.
Segun por a compronde di e informacion, Hulanda lo manda dies enfermero y dos intensivbista pa yuda personal di hospital den cuido di pashentnan di coronavirus
Minister Oduber a expresa cu e ta masha gradici na Hulanda, principalmente Secretario di Estado Paul Blokhuis di Salubridad Publico kende a duna su aprobacion pa e ayudo aki.
E noticia aki a bini riba dialuna na momento cu tabati 63 pashent di COVID den hospital, di cual diesun tabata den ICU. Debi na escasez di personal mester a manda diescinco pashent pa e seccion di Cuido Intensivo na Colombia.
Door di esaki a introduci tambe Toque de Queda despues cu a tuma algun otro medida mas di precaucion. Te cu aworaki e cifranan di contagionan di ayera no ta conoci. Pero si por bisa cu e cantidad di casonan positivo detecta a bin ta bahando. No ta conoci si esaki ta pasobra di berdad tin menos contagio of tin menos hende ta test.