E Representante di Hulanda na Aruba, Corsou, y Sint Maarten, Henk Brons, a haci un donacion di 350.000 dollar di parti di Gobierno Hulandes na e accion di ayudo Hunto nos ta yuda di Cruz Cora Aruba.
Di e forma aki Hulanda ta cumpli cu e promesa di yuda e Arubianonan cu a keda afecta. E promesa a wordo haci door di Minister di Asuntonan Interno y Relacionnan di Reino, Ronald Plasterk na Minister-president Eman durante di un conversacion telefonico cortico cu nan a hiba despues di e yobida pisa di 20 di November. E directiva di Cruz Cora a duna un splicacion tocante di e esfuerso cu nan lo bay haci. E Representante di Hulanda a mustra di ta impresiona y den nomber di gobierno Hulandes e ta desea Cruz Cora hopi exito cu e accion di ayudo.