E momento a yega porfin! Despues di casi seis luna desde di e eleccion, Hulanda lo tin un gobierno di derecha forma pa PVV, VVD, NSC y BBB. “Historico,” segun e lider di PVV Wilders. Su partido nunca antes a forma parti di un gobierno. Segun e fuentenan na Den Haag, Ronald Plasterk t’e candidato pa e posicion di prome minister.
“Nos tin un acuerdo di negociacion,” Wilders a bisa. “Tambe nos a papia riba e prome minister, nos lo continua cu e combersacion den un otro momento. Mi no por bisa nada mas p’awo.” Prome, e negociadonan a discuti e acuerdo cu nan repectivo fraccionnan.
“Despues, nos lo reuni di nobo,” Wilders a bisa. Segun e lider di VVD, Yesilgöz, “e por ta awe tardi.” “E fraccionnan ainda mester aproba.” Lider di BBB, Van der Plas, ta hopi contento. “Mi ta felicita Hulanda.”
Den e acuerdo, cu ainda no tin nomber, segun fuente, a establece cu e frankicianan reduci na mita, lo revoca e ley di obligacion di asilo, e limite di velocidad di 130 km/h riba caminda, lo wordo reestablece mas pronto posibel y lo reduci e cantidad di empleado publico den e ministerionan. Radio publico lo libra un poco: solamente lo corta 100 miyon euro. Pieter Omtzigt lo obtene su corte constitucional tan desea.
Diaranson, e negociacionnan a dura mas di loke a spera. “Asina t’e historia di e formacion aki di gobiero,” Omtzigt a bisa diaranson. “Semper e ta tarda un ora mas. “Omtzigt no kier a bisa nada riba e candidato pa prome minister. “Bo mester puntra esey na sr. Wilders.” Pero e lider di NSC a bisa cu e no tin problema p’e nomber proponi: “Tur cos ta bon.”
Te n’e ultimo momento di e formacion, e tabata hopi emocionante. Tambe diamars anochi, despues di un sesion maratonico di negociacion, por a scucha den ora laat di marduga, cu tur cos tabata avansa extremadamente lento y dificilmente. Cerca di 1’or di marduga, a logra un avance: e cuater partidonan a yega na un acuerdo riba e panorama duro financiero.
E ultimo biaha cu nan a reuni tabata diaranson mainda, segun palabra. Pero el a tarda mas di loke a spera. E cuater partidonan tambe a discuti durante e atardi riba varios tema, incluyendo e tema delicado di pensioen.NSC y VVD a enfrenta otro directamente, pero na final nan a supera e obstaculo.
Gobierno
E decision a wordo tuma. A alcansa un acuerdo di gobierno di derecha, segun e lidernan di partido PVV, VVD, NSC y BBB.
Pa PVV, ta un primicia. E partido di Geert Wilders a participa anteriormente den e gobierno Rutte-I, pero a ocupa solamente e posicion di sosten. Awo, e partido realmente lo drenta un gobierno y PVV tambe lo bin cu minister.
Tambe ta un echo sin precedente pa NSC y BBB. E dos partidonan hoben, recien yega den e wega politico, lo asumi e responsabilidad gubernamental.
E acuerdo preliminar alcansando p’e lidernan di partido diaranson ainda mester wordo aproba pa nan respectivo faccion. Den PVV, e reunion di e fraccion tabata e prome cu a caba. E fraccon ta “hopi feliz, entusiasma y satisfecho,” Wilders a bisa riba e acuerdo. Ainda tin algun punto pa discuti cu VVD, NSC y BBB.
Tambe e fraccion di BBB tin un gran satisfaccion cu e resultado alcansa. “Un gran alivio,” lider di partido Van der Plas, a bisa. “Ta fantastico lcu e baby a nace.” E luz berde a yega poco prome cu 10’or di anochi tambe den NSC. “E fraccion ta unanimamente di acuerdo,” Omtzigt a bisa. “Ainda nos mester dos of tres punto chikito cu nos mester revisa.”