Hulanda ta un pleki cora riba e mapa Europeo di pandemia di corona, pasobra e cantidad di casonan nobo a subi den forma explosivo. Groningen ta cora kima, pasobra e brote eynan ta esun mas serio. E otro diesun provincianan ta un tiki mas cla.
E mapa aki ta wordo diseña door di departamento di salud publico Europeo ECDC, similar di Rijksinstituut voor Volksgezondheid en Milieu (RIVM). E organisacion ta sigui e cantidad di testnan positivo den e ultimo dos simannan y e porcentahe di testnan positivo. Basa riba e mapanan e paisnan por dicidi pa adapta nan reglanan. Por ehempel, nan por bini cu condicionnan mas pisa pa Hulandesnan cu kier bay cu vakantie. Esaki por varia pa pais.
Spaña, Portugal y Cyprus tabata cora caba. Irlanda y Luxemburg ta oranje y resto di Europa ta un lama di berdad, pasobra e cantidad di casonan positivo no tabata di e hopi ey. Pa e paisnan berde, Hulandesnan ta un peligro, pasobra nan por importa e variante Delta cu ta uno hopi mas peligroso.
E mapa di corona, segun minister demisionario Hugo de Jonge (Salud Publico), ta un “stimulante extra” pa endurece e reglanan di corona. Si e contagionan sigui den e forma aki, henter Hulanda probablemente lo bira cora kima. Esey lo por percura cu biaheronan Hulandes mester bay den cuarentena na nan yegada for di exterior.
Pero prome minister demisionario Mark Rutte ta desmenti cu vacacion di Hulandesnan ta hunga un rol pa bini cu medidanan mas fuerte. El a yama esaki un “efecto adicional”. Hopi pais ta mira e cantidad di contagionan y door di e pasonan nobo aki e cantidad di testnan positivo mester baha. E ora e riesgo ta bira menos cu otro paisnan ta pone Hulanda cora.
Un pais ta haya e color berde si den dos siman tin menos cu 75 contagio pa 100.000 habitante. Geel ta ora cu tin entre 75 y 200 contagio. Cora ta ora cu tin mas di 200, y riba 500 contagio pa 100 mil habitante den dos siman ta bira cora kima.
CIFRANAN ALARMANTE
Dene ultimo 24 oranan RIVM a registra 11.064 caso nobo di contagio. Esaki ta e cantidad di mas grandi registra desde Pasco aña pasa.
Ta pa prome bes desde Pasco, casi shete luna pasa, cu den 24 ora di tempo tin mas cu 11 mil caso positivo registra.
E casonan nobo den e ultimo 24 oranan ta mas cu dobel cu siman pasa diahuebs. Siman pasa a registra 5475 caso positivo.
Desde inicio di e pandemia aki tin mas cu 1.7 miyon persona cu a test positivo na Hulanda. Ta calcula cu pa fin di e luna aki lo yega 2 miyon caso.
