NORRISTOWN, Pennsylvania – The Cosby Show a kibra e moldenan den television di añanan ochenta pasobra e tabata draai riba e bida di un famia AfroAmericano di clase media, mediano-halto, di tata dokter y mama abogado, cu tabata biba den un bario di New York di Brooklyn. Durante ocho temporada, e serio a nara e bida, no di un famia di color, sino di un famia, cu tabata di color. Tempo cu Barack Obama a gana e eleccionnan presidencial na 2008, un antiguo estratega republicano a bisa: “Ya nos tabata tin un prome famia AfroAmericano durante hopi aña di hopi forma, tempo cu e show di Bill Cosby, tabata on, nan tabata e famia di America.”
Dialuna, pa 9’or y mey di mainta, den un pueblo di Pennsylvania, yama Norristown, e huicio riba e asina yama tata di America lo cuminsa pa agresion sexual. Cerca di 60 muhe a acus’e di abusa di nan decadanan atras, pero practicamente tur e casonan ey a wordo prescribi y solamente un di nan por a sinta dilanti un tribunal, den e sala A di e condado di Montgomery. Ta yama Andrea Constand y, segun su denuncia, Cosby a drog’e y viol’e un dia di 2004, den un cas cu e comico ta posee pafo di Philadelphia, su ciudad natal.
Constand, Canades, a conoce e actor den e Universidad di Temple, unda cu e tabata train un ekipo di basket y e tabata forma parti di e patronato. E muhe, cu e tempo ey tabata tin 30 aña, a relata cu e tabata sinti su mes nervioso den e cas tempo cu e actor a ofrec’e algun pildo cu tabata supuestamente di yerba contra stress, pero cu ora el a tum’e, el a sinti su mes inmobil, el a lanta desorienta algun ora despues. El a denuncia na 2005, pero fiscalnan no a presenta cargo y e caso a keda resolvi un aña despues mediante un acuerdo extrahudicial.
E tabata un sordido relato dera pa hopi aña, te ora cu a rais di un spiral completamente imprevisibel, a mira luz di dia. Un comico yama Hannibal Buress a haci un joke riba dj’e, yamando e violador na 2014. “Pone “Cosby violador” riba Google, tin mas entrada cu Hannibal Buress”, a haci mofa di dje, segun e relato di Los Angeles Times. E comentario a viralisa y a activa un dozijn di hende muhe, cu a cuminsa acus’e di a abusa di nan añanan atras.
Despues di varios acusacion, e caso a wordo habri bek den e zomer di 2015, despues cu e agencia Associated Press a logra na accede na e archivonan di un interogatorio caminda cu e tata di America, dokter Cliff den ficcion, a admiti di a droga varios muhe pa drumi cu nan.
Cosby, kende ta defende su inocencia y ta sigura cu e relacionnan cu Constant a wordo consenti, e tin cu responde awo pa delitonan di agresion sexual cu agravante cu por cost’e te cu 10 aña di prizon.
Fuente: http://elpais.com/