Hugo “El Pollo” Carvajal a nenga di wordo extradita pa Merca

Hugo "El Pollo" Carvajal

Diasabra cu a pasa, despues di audencia hudicial di Hugo “El Pollo” Carvajal a bira conoci cu e mes a nenga di wordo extradita pa Merca manera husticia di Merca a pidi Spaña. Na mesun momento, e ex-hefe di inteligencia militar di Venezuela, a nenga di tin vinculo cu narcotraficantenan mescos di ta forma parti di FARC (Fuerzas Armadas Revolucionarias de Colombia). Den e audencia hudicial cu a tuma luga na Madrid, caminda Carvajal a wordo deteni Diabierna siman pasa dor di Polis Nacional Spaño riba peticion di Merca debi na un delito economico, a solicita su extradiccion dilanti Huez Alejandro Abascal. Carvajal a declara cu el a sali for di Venezuela un luna pasa den barco y a pasa 16 ora riba lama pa jega Republica Dominicana, caminda el a subi avion y bai Spaña. Carvajal a declara cu su famia a jega Spaña prome cune y nan ta bibando na Madrid. Supuestamente Carvajal a drenta Spaña usando passpoort falso y bao di e identidad di Jose Mourinho. Segun fuentenan Carvajal ta permanece deteni den e centro penitenciario di Soto del Real na Madrid, mientras e proceso di investigacion ta andando y lo mester bai dicidi riba su posibel extradiccion. Den 2015, e Fiscalia di Distrito Sur di Florida ta acusa Hugo Carvajal y Pedro Luis Martin Olivares, amigo y colega di Carvajal, pa crimennan di narcotrafico. Tambe el a wordo sanciona pa Departamentonan di Tesoro di Merca pa su apoyo na actividadnan di narcotrafico y gruponan guerrillero di Colombia. Carvajal a usa su rednan social na varios oportunidad pa suta e regimen di Maduro cu a tilde di “cobarde”. Den tal sentido, tambe el a reconoce e presidente di Venezuela, Juan Guaido y a haci un jamada na e militarnan Venezonalo pa bandona Nicolas Maduro.

Comments

comments