Manera cu ta conoci Aruba tin un reto enorme cu e forma con ta trata cu sushi.
Dump Parkietenbos mester tabata cera pa añanan caba pa diferente motibo
critico ambiental y pa salud. Como un fase transitorio di remediacion di dump a
inicia cu e proceso di empaketa sushi den locual ta yama ‘bales’. E bales nan aki
yena cu sushi di cas ta wordo dera na Sero Teishi, pa asina reduci e cantidad di
desperdicio cu ta deposita na dump Parkietenbos cu 70%. Esaki ta evita cu e sero
di dump Parkietenbos ta sigui crece, cu tur e consecuencianan negativo cu esaki
tin cu ne pa nos medio ambiente, naturalesa y salubridad publico.
Ta importante pa accentua cu deramento di e empakenan cu sushi mester cumpli
cu norma nan pa cu nos medio ambiente, naturalesa y calidad di aire unda cu
mensulamente test nan ta wordu haci. Den e fase transitorio ta sigui busca mihor
alternativa, ta semper trata na mehora e situacion y anda cu sushi na e mihor
forma posibel.
Na februari riba invitacion di Minister Marisol Lopez – Tromp, un reunion a tuma
lugar cu Stichting Parkietenbos y a trata preocupacionnan di e fundacion. Un di e
preocupacionnan cu e fundacion a trece dilanti e tempo ey tabata e situacion di
holor insoportabel na Sero Teishi.
A tene diferente consulta durante di e ultimo 6 lunanan aki y a mehora e forma
cu ta dera e empakenan enormemente. Di e forma aki ta mehora e situacion y e
calidad di aire den e area. Esaki hues a reconoce y a indica tambe den veredicto
recientemente. Pues awo ta mira cu a duna oido na e preocupacionan.