Siman atras den Corte den Promer Instancia a dicta sentencia den e caso penal contra e hobennan E.L. di 17 aña y M.G. di 19 aña. Esaki ta relaciona cu caso di tiramento tanto riba cas y riba grupo di hoben pariba di brug.
Tur dos acusado a presenta y Hues a cuminsa na bisa cu e ta haya legalmente proba cu riba 4 Februari 2016, E.L. y M.G. ta culpable di posecion di arma y menaza cu arma di candela, caminda a tira riba un grupo di hoben.
Hues a bisa cu e ta usa e ley hubenil y ta condena E.L. na 20 luna di prison di cual 5 luna ta condicional cu un tempo di prueba di 2 aña. Ademas Hues a ordena pa den e periodo di prueba, E.L. cay bou guia di Reclasering.
Pa M.G., Hues a bisa cu aunke e ta hoben toch el a usa e ley hubenil. Hues a condena M.G. na l5 luna di prison di cual 3 luna ta condicional cu un tempo di prueba di 2 aña. Aki tambe Hues a bisa cu durante e periodo di prueba, M.G. ta cay bou guia di Reclasering.
Si mira e exigencia di Fiscal pa E.L. cu tabata 18 luna di prison y e sentencia di Hues, por mira cu Hues a pone mas presion riba E.L. door di pone 5 luna condicional pa un periodo di 2 aña.
Si den e periodo di prueba aki, E.L. bolbe cay sera pa un delito di menaza cu arma of otro tipo di violencia, e por conta cu Fiscal lo bay exigi pa pone e 5 luna condicional cerca e castigo cu e lo bay exigi.
Si mira e exigencia di Fiscal pa M.G. cu tabata 15 luna di prison di cual 3 luna ta condicional cu un periodo di prueba di 2 aña y bou guia di Reclasering, por bisa cu Hues a confirma e exigencia di Fiscal
Ariba ambos acusado, Hues a pone presion pa evita cu nan lo bolbe bay haci algo similar. Aparentemente ta un asunto di gang ya cu despues di e tiramento aki, E.L. a wordo hinca durante e parada di luz di San Nicolas y el a bisa cu e ta kere cu ta e gang di Pos Chiquito. Si mira bon, un rato promer, E.L. ta tira riba un grupo di hoben, aparentemente miembronan di gang, na Pos Chikito.