Kralendijk Boneiro: Diabierna den oranan di atardi, Ministerio Públiko i KPNC a yama un konferensha di prensa pa informá tokante e kaso grandi ku ta den investigashon i ku a sagudí nos isla, islanan ruman i asta pais Hulanda, momentu ku durante di un kaso di atrako den anochi di 17 di ougùstùs último, un polis a bin pèrdè su bida na man di e malechornan ku a tir’é. E úniko informe adishonal ku prensa por a tene n’e, ta ku Hues Komisario a prolongá detenshon di tur 6 sospechoso ku Ministerio Públiko i KPNC ta sospecha di ta esnan ku tabata envolví den e kaso DRUM aki.
E trio ku a presidí e konferensha di prensa tabata konsistí di Jose Rosales hefe interino di kuerpo polisial Karibe Hulandes, fiskal mayó Henry Hambeuker i hefe di reshèrshi Eric Willem. Despues ku sr. Rosales a habri e rueda di prensa, el a pasa palabra na fiskal Hambeuker kende a kuminsá mustra nan alegria pa e pasonan ku nan a tuma òf a dal durante último dianan. Nan a hinka hopi esfuerso i kapasidat ku a hasi nan awe ta kontentu di a dal un paso di orguyo, deteniendo e 6 sospechosonan ku ta sera den aresto preventivo. El a bisa ku tur e sospechosonan a keda presentá dilanti Hues Komisario, kende a analisá ku si e aresto i detenshon a bai segun preskribí, ku esaki a bai bon i segun lei. Hues Komisario a tuma un desishon positivo riba esaki i a alarga detenshon di tur e 6 sospechosonan.
Cortesia di Boneiruawe