Un hues federal di Merca a suspende temporalmente parti di e orden ehecutivo aproba pa President Trump pa prohibi entrada na ciudadanonan di Irak, Siria y otro cinco pais Musulman.
E decision hudicial ta pone un paro na deportacion di personanan cu a yega Merca cu un visa valido y cu a keda deteni den diferente airport door di e decision di Trump.
E sentencia, dicta door di hues Ann Donnelly, di Brooklyn, New York ta conta pa personanan cu solicitud di refugio aproba, visa valido y otro personanan cu ta legalmente autorisa pa drenta Merca.
E medida, sin embargo, no ta bisa nada riba e constitucionalidad di e decision presidencial. Tampoco ta cla si e medida hudicial lo permiti e liberacion di inmigrantenan.
E orden presidencial tambe ta implica e suspension di e programa di admision di Refugiadonan durante 120 dia y den caso di Siria, un prohibicion indefini di entrada pa e pais.
E medida a cuminsa wordo aplica diabierna mes y a duna origen na situacionnan confuso ya cu e lo a afecta ciudadanonan cu ya a haya un visa legal y tabata di transito den e pais, como tambe personanan cu ta residentenan permanente of ciudadanonan Mericano pero cu tabata den exterior ora cu e orden a wordo aproba.
Departamento di Homeland Security a indica diadomingo cu e lo cumpli cu e sentencia hudicial pero lo sigui practica e orden di Donald Trump.