Hues a duna traficante un chens y 16 aña despues el a bolbe como Abogado

Bruce Morrow, un hues di Michigan (Merca) diesseis aña pasa a laga un traficante di droga liber. Awo e mesun homber ey a wordo huramenta como Abogado den e mesun sala unda e tabata na punto di wordo condena.

Na 2005, y despues di varios enfrentamento cu ley, Edward Martell a wordo deteni den un operacion antinarcotico den e ciudad di Dearborn Heights. Martell, e tempo ey tabatin 27 aña , y a declara su mes culpabel di bende y fabrica crack, loke por a nifica un castigo di prizon di 20 aña.

Sinembargo, el a haya for di e Hues solamente tres aña di libertad condicional y un reto; cu e proximo biaha cu e bolbe den Corte, e hacie cu un logro, manera un ehecutivo di un empresa.

“E tabata un joke, pero Edward a interpreta esey cu ami como Hues ta kere cu e lo por logra loke cu e kier,” Hues Morrow a conta TheWashington Post.

Pero ta parce cu Martell a sinti su mes inspira pa e muestra di confiansa y a cuminsa studia. Despues di a haya un diploma tecnico, el a haya un beca pa Facultad di Derecho. Durante e añanan cu a sigui, nan a keda den contacto cu otro.

A pesar di e logra un exitoso carera academico y un solido trayectoria laboral como investigado y redactor legal, Edward Martell mester a supera un analisis di aptitud y un revision estricto di antecedentenan penal si e kier forma parti di e Colegio di Abogado di Michigan. Aunke su record delictivo facilmente lo por a stroba e plannan et, e Hunta a dicta cu su pasado no mester marca su futuro y a acepta su peticion.

Finalmente, dia 14 di mei ultimo, Martell, cu su 43 aña, a bolbe den sala di Corte di Morrow pa huramente como abogado.

Comments

comments