Diahuebs mainta Hues di Corte den Promer Instancia a dicta sentencia den e caso penal cu Ministerio Publico a cuminsa contra e homber J.R.M., kende ta wordo acusa di traficacion di hende. Fiscal ta haya J.R.M. culpabel di a duna hospedahe na damanan ilegal pa haci prostitucion ilegal.
MAS NOTICIA por a compronde cu Hues ta haya J.R.M. culpabel di traficacion di hende y a confirma e exigencia di Fiscal.
EXIGENCIA DI FISCAL
Dia 14 di Maart 2024, tratamento di e caso a tuma lugar caminda Fiscal a bisa Hues cu e ta haya J.R.M. culpable di a duna hospedahe na damanan ilegal cu tabata haci prostitucion ilegal. Fiscal a mustra cu tin diferente di e damanan a declara cu nan tabata paga 75 florin pa dia pa apartamento cu J.R.M. tabata huur. Nan tabata haci prostitucion na e apartamentonan. Fiscal a sigui bisa cu tin di e damanan a declara cu nan mester keda paden sino J.R.M. lo yama Warda Nos Costa pa nan. Tin di e damanan a declara cu ta J.R.M. a bay busca nan na aeropuerto. Na opinion di Fiscal, J.R.M. tabata sa cu e damanan tabata haci prostitucion ilegal. Fiscal a bisa Hues cu e no ta kere cu J.R.M. no tabata sa di nada. Fiscal a lesa declaracion di varios di e damanan pa mustra cu nan tabata paga J.R.M. 75 florin pa dia y nan tabata haci prostitucion ilegal. Fiscal ta haya cu J.R.M. tabata haci ganashi. Na opinion di Fiscal, el a bira un costumber di J.R.M. pa huur apartamentonan cu damanan ilegal cu tabata haci prostitucion. Fiscal a mustra cu tin combersacionnan di WhatsApp, caminda J.R.M. tabata instrui e damanan kico nan mester bisa Inmigracion pa asina por drenta Aruba como turista y despues ta keda ilegal y traha prostitucion.
Fiscal ta haya cu J.R.M. a facilita e damanan ilegal hospedahe pa nan haci prostitucion. E ta haya cu J.R.M. a pone salubridad di Aruba na peliger pasobra e damanan ta ilegal y no tabata haci control. Fiscal a tene cuenta cu ta promer biaha cu J.M.R. a cay sera. Fiscal ta haya cu mester manda un señal cu no ta permiti e tipo di prostitucion aki. Fiscal a exigi 24 luna di prison, di cual 12 luna ta condicional cu un tempo di prueba di 2 aña.
SENTENCIA
Awe mainta J.M.R. a presenta den Corte pa scucha su sentencia. Hues a bisa cu e ta haya legalmente proba cu J.M.R. ta culpabel di traficacion di hende. Hues a mustra cu J.M.R. tabata huur e damanan ilegal camber na 75 florin pa dia, pa nan haci prostitucion ilegal. Hues a confirma e exigencia di Fiscal. El a condena J.M.R. na 2 aña di prison di cual 1 aña ta condicional cu 2 aña di prueba.