Recientemente sr. Siegfried Lemonier encarga cu e parti pa dirigi e comision 70 aña di Parokia di Paradera a elabora tocante e celebracion di e Parokia di Paradera.
For di aña pasa Pastor Toti ta cana cu e idea pa celebra Parokia su hubileo di 70 aña na un manera particular. Dia 19 di september 1948 a pone e prome piedra y a bendiciona e misa.
Lo eherce e plan di accion di celebracion : organisa, responsabel y transparente. Un comision organisador di miembronan di nos comunidad parokial cu capacidad animo y curashi pa logra e celebracion aki.
Meta di e celebracion aki ta pa e bira un celebracion cu union y comunicacion mutuo, kiermen cu e comunicacion entre e parokianonan ta hopi importante.
Lo topa otro pa intercambia diferente topico y celebra hunto e historia y logronan di parokia pa fortifica un base di convivencia pa e futuro di nos parokia e añanan nos dilanti.
Plan di accion ta inclui diferente programanan un di nan ta e hubileo pa bario ‘’ Ban alaba Dios hunto.’’ E programa aki lo tuma lugar 1 biaha pa luna den casnan di famia di nos Parokia. Den 1 anochi lo cubri mas cu 1 cas den diferente bario.
Grupo di oracion lo Sali pa haci oracion cu famia pa resa, evangelisa y conscientisa e parokianonan di nan bida cristian y parokial. Lo oficialisa un santo sacrificio di misa den publico di bario.
Pa muchanan di scol : lo tin un concurso di pintamento cu lo hiba e titulo ‘’Ban pinta Santa Filomena.’’ Cu lo termina cu un santo sacrificio di misa y un exposicion di tur e pinturanan.
Pa nos hobennan : lo organisa un wandelmars den barionan di parokia cu lo hiba e titulo ‘’Na caminda pa hubileo.’’
Pa nos hende grandinan lo tin e programa : ‘’Un bida pa duna testimonio’’ cu lo ta un sacrificio di misa cu celebracion di azeta consagra y despues cu encuentro social unda e grandinan lo bini hunto.
Banda di e celebracion di 8 di september e comision organisado ta trahando riba un programa pa tur e parokianonan den un forma cultural social cu lo tuma lugar den luna di october cu ta hiba e titulo : ‘’Un pueblo uni den cultura’’ Mas despues lo tin mas informacion concreto riba cada programa.
Ta pidi cooperacion y colaboracion di tur e co-parokianonan pa cu e aniversario di Parokia di Paradera.