Recientemente Alto Comisario di Cuerpo Policial, mr. Adolfo “Dolfi” Richardson a honra E.H.C. Blom, G.A. Koolman, G.N.P. Kock pa 25 aña, R.L. Brown pa 30 aña y L.M. Joseph pa 35 aña di servicio den Cuerpo Policial di Aruba. A tene e celebracion di e polisnan hunto cu nan famia y coleganan.
Na hopi ocasion ta haci uzo di e momento aki pa felicita e agentenan pe bon trabou cu nan ta haciendo. “E trabou di Cuerpo Policial no ta un trabou facil. Hopi biaha mi ta bisa esey y mi ta gradici e coleganan pa e añanan cu nan a dedica na sirbi y proteha nan comunidad”, asina Dolfi Richardson a remarca.
Hopi hende ta cuminsa na Cuerpo Policial, pero no ta tur ta yega asina leu manera e agentenan aki. P’esey e ta un momento extra ordinario pa celebra 25, 30 y 35 aña di servicio. E ta un logro enorme. “Hasta nos kier enfoca riba esey. Nos kier gradici e coleganan cu a yega asina leu den nan careda di Cuerpo Policial”, Richardson a sigui remarca.
Hopi di e Polisnan aki ta kader, midden kader y funcionarionan, hefe di Cuerpo Policial ta haci un apelacion pa nan sigui duna e guia necesario na otro agentenan. “Manera por ripara, den ultimo lunanan Cuerpo Policial a sali negativo den publicidad. Esey ta algo cu mi a suplica e coleganan aki pa nos duna guia na nos coleganan, specialmente na nos coleganan hoben pa asina nos por zorg cu nan tambe por celebra 25 aña, 30 aña y hasta 35 aña di servicio aki 20 aña”, Alto Comisario Richardson a remarca.
Onderinspecteur Roberto Brown ta traha como docente na Scol pa Polis unda cu e hobennan ta drenta y ta topa cu docentenan cu lo forma nan pa asina nan por eherce nan trabou riba caya debidamente. Dia 5 di Januari 1987 Onderinspecteur Brown a cuminsa como agente policial na Scol pa Polis te cu fecha di awe. El a traha den diferente departamento, manera straat di San Nicolas, Recherche, Sectie Bijzonder Verordering y awo den e ultimo añanan e ta trahando como docente na Scol pa Polis. “30 aña, hopi bon. Tabata tin su subida y bahada. Cuerpo Policial a cambia durante añanan. E ta un reto hopi grandi pa nos sigur como docente di Scol pa Polis, pasobra e muchanan di awendia tin un mentalidad diferente compara con nos a lanta. Nos tin cu forma nan, asina cu nan por haci e trabou cu nos ta desea pa nan haci y pa brinda e servicio cu nos comunidad mester di dje”, Onderinspecteur Brown a remarca.
Pa forma e muchanan como polis ta den man di e docentenan pa asina nan por cana e caminda corecto. “Nos ta haci tur cos den nos alcance asina cu nos mustra nan, manera nan a siña mi den pasado, cu bo ta un pia aden un pia afo. Y con cu bo kier cana e linea ta memey di bo pia. Bo tin cu percura pa cana mas straight cu ta posibel, pa bo keda na e banda corecto”, Onderinspecteur a remarca. E ta dificil y e ta un tarea hopi duro. E hubentud awendia tin un mentalidad diferente compara cu Onderinspecteur Brown. Nan mester mira con pa yega nan pa nan por compronde cu e trabou cu nan scoge ta un trabou di hopi dedicacion y e tin su retonan cun’e.