Pa loke ta Aura Casino, ta bon pa informa cu tin un caso den corte dia 18 di October proximo y FTA ta optimista cu e trahadonan ta gana e caso aki. Loke si ta e debe cu tin eynan pa paga, pa e compania nobo cu ta Island Gaming, cu mas dia pasa ta bira mas grandi. Segun FTA, sintando na mesa lo por yega na un acuerdo cu e compania aki y asina pa e apertura di e casino y pa un cantidad di trahado, por haya trabao, segun Hubert Dirksz di FTA.
No ta manera corecto manera cos a bay, pasobra despues di un cantidad di luna cu e trahadonan a para riba caya y keda na cas sin entrada te awo, tin un luz na horizonte, pero un compania ta bisa cu e no kier carga e gastonan. Mientras cu ley ta bisa cu tin cu carg’e.
Si sa cu ta bin inverti den un operacion di un casino, sa tambe di e leynan y sa cu tin gasto envolvi. FTA ta kere cu e manera aki no ta manera pa cuminsa y si bay run un casino, mester tin suficiente placa pa run e casino.
E casino ta hopi chikito. Ta papia un grupo di trahado no mas cu 25 y ta kere cu mester duna preferencia na e trahadonan cu tabata traha eynan caba. Ta spera cu no ta asina cu un man yen di trahado ta wordo tuma y despues toch ta haya otro trahadonan ta wordo tuma den servicio riba contract cu ta bay trece un problema entre e trahadonan. Ta spera cu manera cu ley ta bisa, cu CAO ta wordo respeta, cu e derecho di trahadonan wordo respeta cu nan salario y tur beneficio y e debe cu tin. E ora ey pa esey ta kere cu e caso lo wordo gana y hues ta dicidi, pero mester sinta na mesa, segun Hubert Dirksz.
Ta spera bon boluntad di parti di e compania pa haci esey y cu pronto e situacion aki ta tras di lomba. Mientras tanto sa cu compania a yama trahadonan, papia cu nan. Tin di compronde cu kier a laga nan firma un acuerdo, cual FTA ta compronde tambe cu tur e trahadonan aki a bisa no. Pa laga e caso bin y atende esaki cu e sindicato, cual ta un paso corecto, segun Dirksz.