Despues di un reunion diamars merdia, gerencia di Riu Hotel no a keda contento cu FTA a haci un paro segun Hubert Dirksz, presidente di e sindicato.
Di parti di gerencia, nan ta cuestiona e paro. Nan ta para ariba cu no tabata tin motibo pa e paro y cu den e cotracto colectivo ta para cu no mag welga. FTA a bisa cu esey no tabata un welga, sino un protesta y ademas di esey, den e caso aki tin un situacion cu apesar cu tin un cao cu bo no por welga, e no ta kita e derecho dependiendo di e gravedad di e situacion pa sali pafo. E ora ey e trahado logicamente no ta uza esey como su prome arma, sino su ultimo arma y den e caso aki e trahadonan a sali afo concientemente, pasobra e situacion di service charge cu nan tin duda den dje, nan ta ricibiendo e no loke nan ta spera, a pone cu despues di un tempo nan ta bisa ta suficiente y ta protesta.
Logicamente como sindicato, a apoya nan, maske cu ta na mesa ta tratando pa entrante November awo, cuminsa cu e controlnan, por lo menos cuminsa combersa cu e gerencia cu ta bin for di Spaña pa por trata pa haya sa e berdad, si e compania aki ta pagando e trahadonan e Service Charge corecto of no.
Una bes cu un trahado tin cu haya su comision, e tin derecho riba e transparencia pa haya sa di su placa, pasobra ta su placa, ta su derecho y a informa e compania tambe cu e derecho ey no por wordo kita for di nan y FTA ta para ariba cu mester bin un control.
Loke a pasa ta cu e compania despues di bay bin den combersacion, cu carta, etc., a bin ta tuma hopi tempo y awor aki e trahadonan, den e situacion cu nan ta, a bisa cu nan ta protesta y a apoya nan, segun Dirksz.
Awor compania di su banda a bisa cu nan ta bay tuma un decision. Nan ta haya totalmente contra. Cualkier decision, warning, suspension cu e compania tuma, pasobra e motibo tabata husto. E situacion tabata preocupante y no tabata un grupo grandi cu a para trabao. Pa e motibo ey ta kere cu ningun medida ta na su luga, segun Dirksz.
E unico medida cu compania por tuma ta, di percura pa e control tuma luga mas lihe cu ta posibel, el a finalisa.