Hubert Dirksz, presidente di FTA, a comenta cu nan tabata tin reunion diabierna riba e posibel reapertura caminda cu e operador Island Gaming lo por bay opera e casino den Barcelo Hotel. Esey lo mester ta si pa e trahadonan cu te awor aki a perde trabao, cu ta un grupo di 18 persona, cu nan lo mester acepta e oferta di e compania cu tin, caminda cu e compania ta dispuesto pa mira e posibilidadnan kico mas por haci cu lo logra pa nan habri e casino.
Awor aki e trahadonan a wordo informa y despues di esey mester informa gerencia, e doñonan di Island Gaming, pa mira si por yega na un acuerdo. Si esey no ta e caso, e ora automaticamente e caso na corte lo continua su curso y for di eynan ta bay wak e ora kico ta e resultado di e decision na corte.
Dirksz a splica cu e trahadonan cu ta considera cu ya nan a perde tur cos, nan ta haya cu compania mester por duna nan algo mas si nan ta bay habri y nan ta sperando di haya algo mas. Esey ta haci tambe cu di banda di FTA, ta desea pa e trahadonan berdad sali bon specialmente den e temporada aki, pero tin tambe un grupo di trahado cu ta pendiente pa e casino habri, cu ta 26 persona cu a keda cu trabao y entre nan dos ta kere cu mester sali afo. Ta asina cu e compania lo mester come across cu un suma di placa pa esnan cu a perde trabao. Loke si ta lamentabel ta, cu loke a pasa y e ta fastioso pa e compania aki tin cu carga consecuencianan di dañonan di otro compania a causa. Door di esey tin comprension p’e. Pero di otro banda tin situacion di trahado, cu si nan tin trabao, nan lo no tin preocupacion. Pero esnan cu ta sin trabao, ta dificil, pa sali man bashi di e situacion aki, Dirksz a splica.