Na e momentonan aki, e asunto di arma, nos costanan y mas desaroyo cu tin di haber cu criminalidad mester por haya atencion. 3 sindicato a cera cabes pa asina formula un carta y manda pa Gobierno. Nan ta FTA, SPA y SADA. Segun presidente di FTA, Hubert Dirksz, ta pendiente awor aki pa reuni cu tur e sindicatonan. Por lo menos mas cu ta posibel, pa atende e asunto di criminalidad cu ta hopi serio. Ta bayendo for di man na Aruba. Ta lamenta esaki y ta haya cu despues di hopi tempo cu a pidi atencion di Gobierno pa atende cu esaki, poco poco ta mira cu e situacion ta bira pio y e atencion ta menos.
Dirksz a sigui splica cu sa cu tin problemanan varios caminda. Na varios nivel. Sa cu tin criminalidad cu no ta wordo ocasiona di un dia pa otro pero e ta bin for di un tempo largo, sigur si tin un situacion social dificil.
Loke a mira na Aruba, cu tin hopi arma y nos costanan ta habri. Nos costanan sa cu Warda nos Costa no ta funcionando manera mester ta. Tin situacionnan cu realmente mester di medida inmediato. Mester di atencion awor aki y tin placa disponibel. Ta kere cu Gobierno por pone placa. Gobierno mester considera e asunto di criminalidad aki hopi serio y un prioridad hopi importante lagando atras tur e otro asuntonan pasobra si esaki bay malo, nos pueblo ta biba den angustia, nos economia ta na peliger. Si esaki continua di e forma aki, e ora eynan ta un iresponsabilidad total di politiconan pa no atende cu esaki, segun Dirksz.
Pa Sindicato di polis y Aduana, e trahadornan kier solucion pero e mester bin di parti di Gobierno pa pone mas fondo segun Dirksz.
Den combersacion cu tabata tin cu SPA y tambe SADA, a bin cla padilanti cu e trahadonan mes ta dispuesto. Nan ta mira problema y nan ta te hasta hala atencion di nan superiornan y di Gobierno pa esaki. Lamentablemente ta mustra como si fuera ta no kier atende cu e asunto. Pesey mes ta forma e bloke aki di tres sindicato cu e peticion pa mas sindicato forma parti di dje, exigi di Gobierno pa haci algo.
No por para keto ta complice di loke ta pasando.
Minister Dowers a bisa cu tin un plan y tin maneho. Pero e so no por controla frontera, etc. E prome minister responsabel ta prome minister. Tin e minister di cu tin di haber cu douane, esta minister Bermudez y logicamente tin minister di husticia cu ta minister Arthur Dowers. Si nan tres por uni, tin placa disponibel. Akinan ta gewoon falta di asumi e responsabilidad.
Si ta pa e sindicatonan, no ta duna ningun tempo. No por duna mas tempo. No por permiti e actitud aki. E falta di responsabilidad aki, segun Dirksz.
Pa loke ta e carta, mas tarda fin di luna ta kere cu mester por yega na algo. Ta di spera esaki y ta tratando pa reuni cu otro sindicatonan tambe. Den e caso aki USA pa por bay atende cu esaki cu mas forsa ainda pasobra nan ta buscando solucion y kier mira di berdad e otro banda di e solucion. No por sigui papia. No por papia di plan y e situacion ta sigui mesun cos, e ora ta di kico ta papiando e ora, e sindicalista a cuestiona.